НОВИ САД – У „Студию М” Радио-телевизиї Войводини (РТВ) вчера, 5. марца, отримани 27. Фестивал рускей народней шпиванки „Ружова заградка”, на хторим виведзени 14 нови композициї у народним духу. Шпиванки, векшином наших композиторох и писательох текстох, оценьовал фахови жири у составе Александар Дуїн, Агнета Маслар, Мария Холошняй, Мирко Преґун и Ирина Гарди Ковачевич, як и публика у сали „Студия М”.
За найлєпшу композицию фахови жири преглашел „Я вандруєм”, композиторки Татяни Колєсар Ґвоїч, на текст Татяни Беук Латяк, у аранжамну Мичу Янковича, а у виводзеню Марка Радишича. Иста шпиванка преглашена за найлєпшу и по думаню публики у сали „Студия М”.
Другу награду достала шпиванка „Писнї рускей”, композитора Алексея Сивча, на текст Санї Дивлякович, котра ю и одшпивала, а аранжаман написал Мирон Сивч. Трецу награду на тогорочним Фестивалє освоєла шпиванка „Дзе ше подзели нашо днї”, хтору на текст Мирослави Даждиу, котра ю и одшпивала, компоновал и аранжман написал Мирослав Пап.
Награду за найлєпши тескт достала Агнета Бучко Папгаргаї, за текст шпиванки „Ей габи”, композиторки Ани Бучко, котра ю одшпивала вєдно з Гелену Ерноич; награду за найлєпши аранжман достал Мирослав Пап, за композицию „На салашу”, за хтору музику и текст написал Микола Чижмар Коле, а одшпивала ю Танита Ходак, док награду за найлєпшого интерпретатора достал Звонимир Кочиш, котри вчера одшпивал нову шпиванку „Нє жаль ми”, композитора и автора аранжману Бранислава Тубича, а на текст Мирослави Даждиу.
Попри спомнутих, на тогорочней „Ружовей заградки” виведзени и композициї Славка Бесерминя, Драґани Ґлувня Бабич, Йовґена Надя, Ондрея Маґловского, Александра Човса, Любомира Загорянския, Михала Лїкара и Михайла Будинския, а шпиванки виводзели и Ивана Чордаш, Мирослав Малацко, Ана Римар, Хлопска шпивацка ґрупа РКЦ з Нового Саду, Александра Колбас, Борис Маґоч, дует Мирела Тимко-Марко Радишич и Михайло Будински. Шпивачох провадзели Вельки народни оркестер РТВ, под руководительством Мичу Янковича, и Студийна вокална ґрупа.
У ревиялней часци Фестивалу представени Дюра Латяк як єден з наших найплоднєйших авторох текстох за нови композициї, нє лєм на „Ружовей заградки”, алє и на „Червеней ружи”. З тей нагоди виведзени седем, у народзе уж познати шпиванки на його тексти, а вчера их шпивали ґрупа „Роса”, Хлопска шпивацка ґрупа РКЦ, Звонимир Кочиш, Татяна Колєсар Ґвоїч, Мирослава Даждиу, Йовґен Надь и Агнета Тимко Мудри з провадзеньом новосадского Хору „Гармония”. Медзи нїма була и вироятно найпознатша шпиванка „Тополї керестурски”, на музику Якима Сивча, як и єдна з новших – „З давен давна”, хтору компоновала Агнета Тимко Мудри, а хтора постала „друга нєурядова” шветочна шпиванка Руснацох у Сербиї. О сотруднїцтве з Латяком бешедовал и композитор Ондрей Маґловски.
Пред початком Фестивалу у голу „Студия М” Ирина Гарди Ковачевич, у присустве авторки, отворела виставу малюнкох Андєлки Античевич з Беркасова, з назву „Квеце”.
Тогорочну „Ружову заградку” отворел заменїк ґенералного директора Явней медийней установи РТВ Йожеф Клем, конферансу перши раз водзели Ивана Ловас и Андрей Орос, а попри численей публики з наших местох, програму Фестивалу провадзели и чолнїки Националного совиту Руснацох, наших установох, институцийох и здруженьох.
Орґанизатор и ґенерални покровитель Фестивалу Радио-телевизия Войводини, так же, як кажди рок‚ Фестивал директно преношени прейґ ТВ, радия и интернету, а отримованє „Заградки” помогли и нашо институциї и привреднїки з наших местох.
Орґанизаторе наявели же и того року будзе обявени промотивни компакт-диск з композициями з 27. „Ружовей заградки”.