КОЦУР – Попри духовней часци, Кирбай у Коцуре провадзи и вше нащивена вашарска часц, хтора и того року почала даскельо днї пред Кирбайом.
Кирбайски вашар у центре валалу бул дакус менши як скорейши роки, алє з богатим понукнуцом рижнородней роби и лакоткох, та з рижнима бависками за дзеци. Понеже того року Кирбай бул пияток, вашарска часц и розвага буду предлужени и нєшка и ютре.
Було обачиц же пред и на сам Кирбай валал ожил, було наисце вельо нащивительох, на Кирбай Коцурци привитали и велїх госцох зоз страни, ноцами з вецей местох було чуц музику за кажди смак, а погосцительни обєкти були полни.