ВЕРБАС/КУЛА – Општини Вербас и Кула добитнїки грамоти „Лидере отримуюцого розвою”, хтору додзелює проєкт з истим меном, а грамоти уручени 26. фебруара у Сримскей Митровици, на першей конвенциї спомнутого проєкту.
Попри Кули и Вербасу, грамоту достали ище шейсц општини, односно городи – Сримска Митровица, Рума, Нови Сад, Зомбор, Шабац, Србобран и Сримски Карловци.
Проєкт „Лидере отримуюцого розвою” пошвецени локалним самоуправом и компанийом – ношительом напредних трехнолоґийох хтори у сотруднїцтве з локалнима самоуправами витворюю проєкти з тей обласци.
У мено Општини Вербас награду приял єй предсидатель др Братислав Кажич, а у мено Општини Кула заменїк предсидателя Општини Велибор Милоїчич.
Теми першей конвенциї того проєкту у Сримскей Митровици були енерґетска ефикасносц, отримуюци розвой и защита животного штредку, як и зазберованє проєктох локалних самоуправох з тих обласцох.
На конвенциї присуствали и представителє дзепоєдних компанийох и банкох, а сход орґанизовал Централни европски форум за розвой, под покровительством Влади Сербиї и Привредней комори Сербиї.