ЗЕМПЛИНСКА ТЕПЛИЦА – Прешлого пиятку зоз Земплинскей теплици ше врацели школяре осмей класи Основней школи „Петро Кузмяк” з Руского Керестура дзе од 8. януара пребували на екскурзиї хтору за керестурских осмакох уж треци рок орґанизує Национални совит рускей националней меншини.
Школярох провадзели як представитель Совиту Желько Ковач, потим директорка и секретар керестурскей Школи Хелена Пашо Павливич и Михайло Надь, як и оддзелєнски старшини наставнїци Мария Балїнт и Оливера Винаї.
Керестурски школяре були госци тамтейшей Основней школи на чолє з директорку Марцелу Станчикову, з чиїма парняками ше дружели на орґанизованих вечарох, а були змесцени у интернату Ветеринарского факултету хторе ма у тим месце польопривредне добро.
Попри друженя з парняками, домашнї керестурским школяром орґанизовали обиходзеня знаменїтосцох Земплинскей Теплици, дакедишнього Керестура, алє и околних городох – Кошицох, Гуменого и Требишова.
Екскурзию до Словацкей школяром орґанизовал наш Национални совит хтори финансовал половку трошкох и то зоз средствох хтори достава од локалней самоуправи Општини Кула, док другу половку финансовали родичи дзецох.