КУЛА – Одборнїки Скупштини општини (СО) Кула на нєшкайшей схадзки буду розпатрац витворйованє општинского буджету за перши тогорочни дзевец мешаци, а мала би буц принєшена и Одлука о висини стопи порциї на маєток у кулскей општини.
На дньовим шоре схадзки СО Кула, хтора почнє на 10 г., и порушованє поступку за ликвидованє ЯП „Завод за вибудов Кула”, приношенє Одлуки о окончованю комуналней дїялносци, одлуки о доприносу за ушорйованє будовательней жеми, а медзи иншим, и о условийох и надополнєню за запровадзованє права службеносци преходох и поставяня обєктох на явних поверхносцох и у явней власносци.
На схадзки би мали буц одредзени и державни драги першого и другого шору хтори преходза през места кулскей општини, як и даванє согласносцох на вименки и дополнєня програмох дїлованя комуналних подприємствох.
На дньовим шоре и кадрово питаня, понеже маю буц вибрани стаємни члени комисийох СО, та розришени и меновани члени управних и надпатраюцих одборох дзепоєдних явних подприємствох и установох чий снователь Општина Кула.