НОВИ САД – У виданю НВУ „Руске слово” тих дньох обявени два нови наслови – кнїжка поезиї Славици Шовш „Безсони ланцущок” и кнїжка Мирона Жироша о нашей историї – „Мадярска Горнїца”.
Шовшова у нашей явносци позната по своїх провокативних романох хтори обявела по сербски – „Мушкарчина” (2007) и „У златним маказама” (2010), а тераз ше, як у предслову пише др Валентина Чизмар, явносци представя зоз збирку писньох хтора през емоцийни и думкови лиризем, як и з прозну лирику, до рускей литератури приноши нове поетске унапряменє през особне и автентичне дожице сучасносци и чловековей загартушеносци з ню.
Нова кнїжка Мирона Жироша „Мадярска Горнїца” состойна часц векшого штиротомного проєкту з виглєдованьох автора о миґрацийох Руснацох до Бачкей и Сриму. Уж обявена кнїжка „Польска Горнїца”, а мали би ушлїдзиц ище „Словацка Горнїца” и „Українска Горнїца”.
„Кнїжка „Мадярска Горнїца”, як демоґрафийно-етноґрафийни драгопис, спатра живот Русинох/Руснацох у нєшкайшей Мадярскей, а специфична є по тим же константно указує на паралели у фолклоре, звичайох, традициї и бешеди медзи Руснацами у Сербиї и Горватскей и Русинами у велїх местох нєшкайшей Мадярскей.
Збирка поезиї „Безсони ланцущок” ма 164 боки, сучасно є дизайнована, а „Мадярска Горнїца” ма 188 боки и богата є з фотоґрафиями.
Обидва нови кнїжки – Шовшовей за 300, а Жирошову за 500 дин., мож купиц у просторийох НВУ „Руске слово” у Новим Садзе и Руским Керестуре, як и наручиц прейґ сайту „Руского слова”.
