НОВИ САД – У Спомин-збирки Павла Белянского у Новим Садзе концом прешлого тижня отримани округли стол о култури у Войводини у 2017. року, хтори орґанизовали „Колор прес ґрупа” и маґазин „Економист”.
На округлим столє бешедовали заменїк покраїнского секретара за културу, явне информованє и одношенє з вирскима заєднїцами др Необойша Кузманович, управитель Спомин-збирки Павла Белянского др Ясна Йованов, народни посланїк Дьордє Вукадинович, Бранислаб Ґрубачки спред Европского руху Нови Сад и директор Музею сучасней уметносци Войводини Радован Йокич.
Як гварел заменїк покраїнского секретара Необойша Кузманович, укладанє до култури нє лєм даванє средствох на основи конкурсох, лєбо за проєкти, алє то єден обдумани стратеґийни план розвою култури у єй фундаменталним смислу, та и манифестацийним.
– Кед гварим фундаментални, ту думам на видавательство, подобову уметносц и музику, алє у складзе зоз становисками Покраїнскей влади, хтора думаня же треба пестовац националну културу – гварел Кузманович и додал же у Войводини єст 429 доми култури, коло 60 дворци хтори, менєй-вецей девастовани и у нїх нєт, а требало би отримовац рижни културни змисти. Прето, як гварел, важне же би ше з локалнима самоуправами пренашло спсоби за оживйованє култури у малих местох, алє то уж питанє єй децентрализованя.
Кед слово о тим цо нас у култури обчекує у идуцим року, єдно зоз заключеньох з того округлого столу то „поцерпанє”.