БЕОҐРАД – З приватизацию загашени числени медиї котри ґарантовали уставне право националним меншином, оценєл пияток, 9. децембра защитнїк гражданох Саша Янкович и додал же то и причина пре хтору нє можеме буц задовольни з информованьом на язикох меншинох.
Резултати Окремного звиту о информованю на язикох националних меншинох после приватизациї медийох нєзадоволююци, гварел защитнїк гражданох Саша Янкович.
Янкович визначел же информовани припаднїки националних меншинох интеґровани до дружтва, алє, як гварел, потребне информовац припаднїкох векшини о тим цо припаднїки меншинох робя, думаю, жадаю, чувствую, а лєм ровновага тей файти доприноши лєпшим одношеньом медзи гражданами.
Янкович гварел же ше реформски закони найбаржей одношели на локални медиї, хтори ше углавним занїмали з информованьом меншинох, и поволал власци же би з окремну увагу пречитали тот звит.
Додал же два роки од прилапйованя Закона о явних медийних сервисох, РТС нє сполнєла свою обовзку ґу националним меншином, док РТВ успишно сполнює свойо обовязки.
Тиж так, омбудсман министерством култури и информованя, та державней управи и локалней самоуправи упутел препоруку же би з медзисобно усоглашенима предкладанями реґуловали финансованє новинско-видавательних установох чийо снователє национални совити националних меншинох и най одредза ясни критериї на основи хторих ше софинансує електронски медиї националних совитох, кед окончую улогу локланого медию.