ВЕРБАС – Вчера у вербаским Центре за физичну културу „Драґо Йовович” отримана велька акция, односно Саям спорту з назву „Цо тренираш”, хтору нащивел и министер младежи и спорту у Влади Републики Сербиї Ваня Удовичич.
Проєкт „Цо тренираш” запровадзує Министерство младежи и спорту и Спортски союз Сербиї, а витворени є у сотруднїцтве з локалну самоуправу пре опредзельованє дзецох за рижни спорти и трениранє.
Вербас вчера нащивели и предсидатель Спортского союзу Сербиї Александар Шоштар, ґенерални секретар Спортского союзу Сербиї Владимир Батез и атлетски репрезентативец Даниєл Дане Корица.
На акциї участвовали прейґ 2 000 школяре з основних школох у вербаскей општини, а делеґацию Спортского союзу Сербиї приял и предсидатель Општини др Братислав Кажич.
