НОВИ САД – Покраїнски секретарият за социялну политику, демоґрафию и ровноправносц полох розписал Явну поволанку за предкладанє кандидаткиньох и кандидатох за рочне Припознанє у обласци ровноправносци полох за 2015. рок, Термин за доручованє предкладаньох 4. новембер до 14 годзин.
Припознанє ше додзелює у двох катеґорийох – за поєдинца/поєдинку и за орґанизацию, а можу буц предложени гражданє и гражданки, здруженя гражданох, нєвладово орґанизациї, подприємства, орґани и орґанизациї з териториї Войводини.
Припознанє ше додзелює за континуоване доприношенє розвою демократских процесох у дружтве, односно за посцигнути значни резултати у витворйованю политики єднаких можлївосци за жени и хлопох у шицких обласцох, а окреме у обласци роботи и обезпечованя роботи, у политичним и явним живоце, социялней и здравственей защити, у образованю, информованю, култури и спорту. Припознанє ше состої з дипломи, статуи и пенєжней награди, а одлуку о добитнїкох приноши Покраїнска влада, на предлого Совиту за ровноправносц полох.
Писмени предлоги (з биоґрафию и толкованьом) треба посилац на адресу: Покраїнски секретарият за социялну политику, демоґрафию и ровноправносц полох, Бул. Михайла Пупина 15, 21 000 Нови Сад, лєбо на е-адресу: pssp@vojvodina.gov.rs, з наглашеньом „За додзельованє Припознаня”.