РУСКИ КЕРЕСТУР – З читаньом стихох Меланиї Павлович, вчера у рускокерестурским Замку почала програма 10. манифестациї „Поетски нїтки Меланиї Павлович”, а подзелєни и вецей припознаня Дружтва за руски язик, литературу и културу (Дружтво), хторе зоз свою Секцию у Руским Керестуре и орґанизовало програму.
Стихи Павловичовей читали школяре штвартей класи Андрея Надь и Валентин Чуни, а школяре цалей штвартей класи керестурскей ОШ „Петро Кузмяк” одшпивали шпиванку „Тисяч радосци”. Биоґрафию Меланиї Павлович и єй писню „Нїтка” пречитала модераторка програми и секретарка керестурскей Секциї Дружтва Мария Дорошки.
Заступнїца Дружтва Ирина Папуґа потим уручела Припознаня „Мелания Павлович” найвреднєйшим читачом керестурского Оддзелєня кулскей Народней библиотеки (валалскей) и Библиотеки Школи „Петро Кузмяк”, а уручени и припознаня „Осиф Фа, учитель”, „Витомир Бодянец”, „Владимир Мирко Ґаднянски” и „Микола Скубан” заслужним просвитним, културним, музичним, новинарско-публицистичним и театралним творительом з Керестура. Добитнїком з других местох припознаня буду уручени познєйше.
Часопис Дружтва „Студия рутеника” додзелєни Владимирови Мученскийови (дакедишньому секретарови у Школи) и Здруженю ремесельнїкох и приватних поднїмательох, а керестурскому Оддзелєню ПУ „Бамби” кнїжка „Червене пупче”.
