Дюра Латяк, бувши одвичательни редактор и директор НВУ „Руске слово”, писатель и публициста бул и длугорочни аматер у Руским културним центру. У роботи того дружтва участвовал скоро од самих початкох його снованя, а його анґажман бул у вецей секцийох, шпивал, грал, танцовал и ґлумел, а помагал и у орґанизациї роботи. Нєшка є ище вше активни член РКЦ у Хору „Гармония”. З нами подзелєл свойо здогадованя на дакедишнї час кед дружтво починало з роботу и ношело мено КПД „Максим Горки”, на дзепоєдних членох, як и на дакедишню роботу.
РС Вашо перши памятки, перши контакти з новосадским РКЦ?
Мойо перши памятки помишани зоз тим цо сом познєйше дознал пишуци моноґрафию о театралним живоце Руснацох на тих просторох. А дознал сом (и записал) же пририхтованя за орґанизованє културного живота Руснацох у Новим Садзе почало од перших дньох по ошлєбодзеню города од окупатора. Медзитим, гоч ше даяки активносци уж од теди спорадично одвивали, писани шлїди о тим нєт.
Остало зазначене аж же 29. новембра 1945. року отримана Сновательна схадзка Културно-просвитного дружтва Русинох. То дакус одскакує од потедишнього вертикалного орґанизованя Руснацох у ошлєбодзеней жеми. Познате же 21. октобра 1945. року у Руским Керестуре основана Руска матка як єдинствена културна асоцияция Руснацох, котра мала свойо такволани пододбори у каждим месце дзе у значнєйшим чишлє жию Руснаци. Лєм у Новим Садзе таки пододбор нє исновал, алє основане окремне културно-просвитне дружтво. Поставя ше питанє же прецо то так було? Одвит на ньго би мог буц факт же у Новим Садзе у медзивойновим чаше значни вплїв на културно-просвитну дїялносц Руснацох мали два себе опозицийни орґанизациї: Руске народне просвитне дружтво и Културно-просвитни союз югославянских Русинох. И єдно и друге ше борело за превласц! Прето ше после ошлєбодзеня з нєдовирийом патрело на програму дїялносци новооснованей Рускей матки. Бул потребни достаточни час же би ше новосадских преднякох прешвечело же Руска матка основана „на нових идейних основох” и же вецей нєт причини за подзелєносц. Прето аж 10. фебруара 1946. року отримана друга схадзка, на котрей принєшєна одлука же Дружтво постава филияла Рускей матки. Тот 1946. рок остатнїх рокох вжати як початок орґанизованого културного живота Руснацох у Новим Садзе. Од того часу новосадске дружтво ноши популарну назву Матка (або, у остатнїм чаше Руска матка, цо ше погришно повязує зоз новоосновану културну асоцияцию зоз истим меном), котру прилапели шицки новосадски Руснаци и їх приятелє.
На схадзки 10. фебруара 1946. року вибране и нове руководительство Дружтва (т. є. Месного одбору Рускей матки). За предсидателя вибрани адвокат др Михал Рамач, за секретара Гелена Сивч, а за касира Янко Обровски. Як остало зазначене, тедишнї грекокатолїцки новосадски парох о. Максимилиян Буїла дал согласносц же би ше културно-просвитна дїялносц новосадских Руснацох одвивала у просторийох у власнїцтве Грекокатолїцкей церковней општини, дзе була скорей руска школа и дзе ше од 1936. року тиж одвивала културно-просвитна дїялносц „Просвити” (РНПД-а)
РС Ваш аматерски анґажман у новосадским РКЦ?
Я першираз ступел до просторийох терашнього Руского културного центру дзешка у априлу мешацу 1949. року. Значи, три роки после прерастаня Дружтва до Месного одбору Рускей матки, кед уж анї Одбор як таки нє исновал, бо и Руска матка як централна руска културна асоцияция „преросла“ до Секциї, та Руснацох при Союзу културно-просвитних дружтвох Войводини, та по наших местох знова основани КПД-а. Так и у Новим Садзе 15. марца 1949. року знова основане Културно-просвитне дружтво Русинох, котре, на предлог писателя Евґения М. Кочиша, достало мено „Максим Горки“.
Кед же ме паметанє добре служи, теди на чолє Дружтва бул Василь Винаї, а у узшим руководительстве були Яким Саламун, Кирил Скубан, Штефан Страценски, Ферко Джуджар, Евґений М. Кочиш (задлужени за драму), и ище дзепоєдни особи, чиїх ше менох у тей хвильки нє здогадуєм.
Я теди, як шеснацрочни леґиньчок, гудацки син, почал грац у новооснованим оркестру, за котри инструменти подаровал Штефан Страценски, котри теди бул и директор Музичного маґазинна, дзе ше таки инструменти и вирабяло. Алє я ше у городзе нє затримал длуго, бо ме у септембру 1949. року анґажовали до „Руского слова” у Керестуре и послали до новинарскей школи до Беоґраду.
До Нового Саду сом ше врацел по законченю новинарскей школи у половки фебруара 1951. року, бо сом бул розпоредзени на роботу до Рускей редакциї Радио Нового Саду. Теди сом ше знова анґажовал у КПД „Максим Горки”. Ту сом ше упознал зоз Драґеном Колєсаром (теди ище школяром Ґлумецкей школи), а пошвидко до варошу сцигнул и учитель Витомир Бодянєц, котри позберал руски дзеци школского возросту и обновел штирокласни комбиновани оддзелєня школи з руским наставним язиком. У Рускей редакциї теди уж були заняти як новинаре Мария Горнякова, Янко Рац и Микола Скубан. Шицки вони були анґажовани и у КПД „Максим Горки”. Було ми цалком лоґичне же би ше ґу нїм и я приключел.
РС Як ше дакеди робело, дзе сце путовали, як сце ше знаходзели за средства?
Робели зме шицки шицко. Рихтали зме кратки єднодїйки, а по потреби зме и танци рихтали. Паметам же Витомир Бодянєц и я зоз дзивчатми Леону Фейсову и Гелену Ґрайцарову на вецей концертох танцовали „Козачок” и „Катарину”. А и грали зме як вокално-инструментални состав: Драґен на приму, я на контри, а Витомир на гармоники. На басу грал бачи Ферко Джуджар, а з часу на час го заменьовал Микола Скубан. Мушим ту спомнуц же Драґен, Витомир и я и бивали у єдним квартелю. Були зме тот косцанїк коло котрого ше зберало цале младе членство тедишнєй Матки. Нєдзелями зме грали и танци, на котри приходзели и нашо приятелє аматере зоз словацкого „Шафарика“, а дакеди ми одходзели до нїх.
Драмски фалати рихтал Драґен Колєсар (до єднодїйки „Любовне писмо” К. Трифковича я „ускочел”, як алтернатива место Елемира Джунї, котри мушел пойсц до войска) а орґанизатор виводзеньох бул Евгений М. Кочиш. Представи зме давали по шицких наших местох. Од реквизитох зме ношели лєм тото найнужнєйше, а сцену зме поставяли зоз фундусох яки зме нашли там дзе требало наступиц. Гайзибански карти зме себе сами плацели, цо теди нє було драге, а зоз гайзибанских станїцох нас домашнї на кочох одвожели до своїх валалох. Нє паметам же би теди Дружтво достало даяку дотацию. Шицко ше робело волонтерски. У єдней часци нєшкайших просторийох бивали двої квартельоше – Салаґово и Олєярово (родичи нашей познатей шпивачки и мухзичней редакторки Веруни Олеяровей и єй шестри Любици, котра була и шпивачка и єден час спикерка у Рускей редакциї Радио Нового Саду). Кед добре паметам, їх мац була таке дацо як волонтерска домарка. При нєй зме охабяли ключ од Матки, а вона з часу на час за нами позаметала и попораєла салу, же би була порихтана за школску наставу.
У 1952. року Витомир Бодянєц мушел пойсц одслужиц войско, та на його место, закончиц школски рок, пришол учитель Янко Медєши, по походзеню з Руского Керестура. Нажаль, вон нє бул музикални, алє бул добри орґанизатор и у Матки.
Истого року, влєце (кед ше нє спреведам), до Нового Саду за учителя пришол наш писатель и културни дїяч Михайло Ковач зоз фамилию и уселєл ше до єдного зоз спомнутих квартельох при Матки. Такой бул меновани и за секретара КПД „Максим Горки”. Пробовал орґанизовац и хор, бо и члени його фамилиї були музикални, а коло нїх ше позберало значне число новосадских Руснацох. Єден час тот хор водзел Мирослав Шанта, професор новосадскей музичней школи (по походзеню з Вербасу). У тим чаше значну популарносц здобул дует Олена Ковач–Олґа Обровски, Веруна Олеяр и Ирина Давосир (оперска шпивачка), котри и „на живо” теди шпивали прейґ габох Радио Нового Саду.
З оглядом на тото же Драґен теди уж дипломовал и такой достал анґажман у Сербским народним театре, режиї ше прилапел учитель Ковач вжал на себе и пририхтованє театралних фалатох. Я, наприклад, участвовал у двох у його режиї: „Заврачане благо” (1953) В. Ванченка и „Шельменко денщик посилни” Г. К. Основяненка (1954), а вец и я пошол одслужиц войско. Кельо знам, дальшу режию превжал на себе Яким Мудри (пензионовани штрикер, по походзеню зоз Шиду), вец Владимир Ґаднянски, Дюра Папгаргаї и Янко Виславски.
Свою активносц у Матки предлужел сом 1968. року, по приселєню НВП „Руске слово“ до Нового Саду, котрому я теди бул на чолє. Од теди, з кратшу прерву, а у нєй активни аж по нєшка (кед нє рахуєм прерви, вец полни 68 роки!).
РС Цо нєшка иншаке, чи нєшка лєпше, чи горше?
Можем повесц же ми иншаки! Мали зме єден длугши период кед зме мали значну потримовку дружтвеней заєднїци, котру зме заслужели зоз посцигнутима резултатами у културно-просвитней дїялносци. У тим чаше ше адаптовало просториї, власц нам допущела прешириц ше и на сушедни простор, котри зме адаптовали за свойо потреби и з тим злєпшали квалитет роботного простору.
Доставали зме средства за финансованє основней дїялносци Дружтва (директор, кнїжководитель, гиґиєничар-пораяч, уметнїцки руководитель, гонорарни дириґент и ин.), а по потреби и додатни средства за путованя на змаганя и на наступи у иножемстве. Шицко тото резултовало и зоз висшим квалитетом нашей културно-уметнїцкей роботи. Значи, могли бизме повесц же нам теди було лєпше. И у поровнаню зоз предходним периодом по шейдзешати роки прешлого вику, и зоз периодом котри ушлїдзел по розпаду бувшей СФР Югославиї.
Алє, остатнї роки, од кеди активно дїйствує Национални совит Руснацох, улїваю нам значну дозу оптимизма. Свидоми зме же ше наша жем нашла у економскей кризи, же индустрийни капацитети у добрей мири знїщени у периодзе приватизациї, та и державни буджет ослабени. На щесце, тот период уж за нами и мож ше наздавац же и култура почувствує проґрес.
