ВЕРБАС – У Вербаше нєшка будзе Саям професийней ориєнтациї, хтори орґанизую Канцелария за младих Општини Вербас и Национална служба за обезпечованє роботи, а под покровительством Општини Вербас. Саям будзе у Центре за физичну културу од 10 до 14 годзин, а мото того представяня образовних профилох „Упознай швет занїманьох и вибер праве за себе”.
Участвованє на Сайме потвердзели дванац штреднї школи рижних профилох з Кули, Вербасу, Нового Саду, Футоґу, Србобрану и Сримских Карловцох, як и 12 факултети универзитетох у Новим Садзе и Беоґрадзе.
– Намира нам школяром представиц цо вецей образовни профили и напрями, а хтори дефицитарни и з хторима вельо реалнєйша шанса за доставанє роботи – гварела началнїца Оддзелєня за дружтвени дїялносци Општини Вербас Мира Недич и додала же акцент Сайму и на професийней ориєнтациї талантованих, та орґанизаторе обчекую же будзе участвовац и Виглєдовацка станїца „Петница”.