Дїдо Шнїжнїк зоз вайцох

автор Пририхтала Славица Фейса 23. децембер 2014

Потребне:

6 на твардо уварени вайца

6 уварени препилково вайца

мархва (за нос)

векша огурка (за шапку)

10 желєни лїсца младей цибулї

зарна попру (за очи и ґомбички)

2 ложки паштети з курчеца

3–4 ложки маси за полнєнє.

Маса за полнєнє:

звязка вашильцу

по 4 конарчки петрушкового лїсца або копру

10 до 12 лїсца шпинату

2 струча цеску

30 печени и очисцени лїсковци

3 ложки пармезану

150–200 мл маслинового олєю

солї и попру по смаку.

Перше треба порихтац масу за полнєнє. Шицко окрем олєю положиц до глїбшей судзинки и зоз миксером зомлєц. Олєй помали додавац, же би ше справело густу масу. З тей маси потребни лєм 3–4 ложки за нашо єдло, а тото цо останє чувайце у фрижидеру и хаснуйце за друге, як намасток…

Уварце препилково вайца (варце лєм 2 минути од того часу кед вода почнє врец). Вайца покладзце вариц так же би „стали”, а нє лєжали у судзини, бо вец лєгчейше винєце жовчки. Кед су уварени и охладзени, дакус одрежце зоз сподку вайца же би лєпше могли стац. Помали повиберайце жовчки. Жовчки з курових вайцох поджамце и додайце до маси за полнєнє, та кед ше охладзи наполнїце курово вайца. Препилково жовчки тиж поджамце и додайце до паштети з курчеца, помишайце, и зоз тим полнїце препилково вайца (найлєпше полнїц зоз шприцадлом, або мещком на хторим пререзани верх).
Векше вайцо положце на сподок, а менше на верх. Зоз зубодлобками их скапчайце. З огуркох справце шапку, з цибульових лїсцох хтори сце кус зограли завяжце шал, з попру справце очи и ґомбички…

Понукнїце госцом як предєдло през наиходзаци швета.

(Опатрене 89 раз, нєшка 1)

НАПИШЦЕ УПЕЧАТОК