Чом пишем праве о тей теми, и цо ту таке цикаве цо вам сцем повесц? Пред даскельома днями бул дзень дзивчатох. Тот дзень ше слави од 2012. року же би ше подзвигло свидомосц о проблемох, хтори маю дзивчата на ґлобалним югу, у жемох розвою.
Наисце, у тих жемох часто вельке худобство, у материялним смислу. Велї дзивчата ше одаваю барз млади, малолїтни и нє можу ше школовац. Донєдавна, подобна ситуация була и у Сербиї. Школи, до хторих могли ходзиц дзивчата и дзивки, настали аж у першей штварцини 20. вику. И праве прето споминам 11. октобер, бо маме длугоку историю борби за женски права, вони нє вше були справедлїви, а нєшка, гоч су леґално и институцийно препознати, културно и морално зме ище вше нє вишли зоз початку 20. вику.
Нєшка маме єднаки права, алє условия за нашо животи ище вше нє цалком исти.
Дзивчата одмалючка уча же муша буц послухни, мирни и добри, та ше вец нє знаю анї побунїц кед им дацо завадза. Кед ше даєден хлапец до це задзера и нє да ци мира, то значи же му ше пачиш. А цо тебе значи кед йому нїхто нє потолковал же ше симпатиї нє указує на тот способ? Же у шоре кед дзивче нє ма исти чувства и кед є нєзаинтересована.
Тоти мали, на перши попатрунок нєважни хвильки у живоце помали уча дзивчата же муша дацо церпиц, а хлапцох же нєт вельо гранїци хтори их буду зоперац, та можу робиц скоро шицко цо сцу.
У нєшкайшим чаше ше то одноши и на дзелєнє интимних сликох зоз пайташами. А далєй можеме спомнуц и розвой одношеня ґу целу и випатрунку.
У женским швету випатрунок ма барз вельку цену, нательо же кед на даяки способ „вискакуєме зоз рамикох”, людзе ше такой престраша, коментарую и пребарз возбудзую коло того. Док сом була на основних студийох у Беоґрадзе, барз була популарна серия Викинґи. Мнє ше так барз пачела їх естетика же сом обритвела пол глави, а на другим боку сом мала длуги власи. Барз любим пирсинґи, та сом у тот час мала три на твари. Вшелїяк, родичом ше то барз нє пачело, такой було бешеди же то нє у шоре, питали ше ми же чом я так сцем випатрац, прицаговац неґативну увагу, и спричиньовац цошка цо анї им нє було ясне. Я лєм сцела випатрац „кул”, уж цо ми то теди значело. Сцела сом буц иншака и було ми важне най мой вонкашнї випатрунок провадзи нукашнї чувства. И тото цо нєшка обачуєм, то же сом ше теди як „викиншкиня” чувствовала барз женствено, у даяким абстрактним, алє и правдивим смислу.
Теди сом водзела рахунку о власох як нїґда пред тим, вони вше були змити, раз тижньово сом бритвела главу, шминка вше була на месце, а нохци вилакировани, длугоки и очувани.
Алє, другим сом випатрала страшно, думали же ше бридж пирсинґ джобе през косц! Гагага :) Но, алє и тот час прешол, и якошик сом розвила свой стил у хторим ше чувствуєм добре. Можебуц кус менєй провадзи тото сом сом знука, алє сом прилапела даяки норми хтори другим людзом нє таки проблем прилапиц.
Сцем ше врациц на тоту тему о целох, моци и идентитету. Єдна часц мнє вше у якимшик бунту зоз културнима нормами, нє любим цудзи етикети и кед дахто пове же „то треба так, бо шицки так робя ”. Сцем себе сама давац етикети. Любим повесц себе же найважнєйше же сом мудра, нє у смислу еґа, алє у смислу же важнєйше тото цо у моєй глави, и у моїх думкох, од того як випатрам. Важнєйше тото же сом любопитлїва, же цали живот сцем цошка нове научиц, и же ученє тото цо ме етикетує, а нє випатрунок.
Понеже жиєм у реалносци хтору можем покус меняц, алє нє цалком,
то значи же даєдни аспекти мойого идентитету вше буду у моци и у рукох других людзох. Нажаль, часто у рукох хлопох чийо намири нє вше ясни, а анї чесни.
Любела бим ту стануц
.
.
и роздумац о тим же сом обєктивизована з боку хлопох, дакеди свидомо, а дакеди нє (*objectification (анг.) – тото поняце у феминистичней теориї означує процес у хторим ше найчастейше жену представя, третира и видзи нє як цалу свойствену особу зоз власнима думками, чувствами и волю, алє як обєкт, найчастейше як сексуални, хтори иснує же би задоволєл других (углавним хлопох)).
Вредносц жени у єй випатрунку постава реалносц зоз хтору ми жиєме кажди дзень. Кед гварим обєктивизована, ту думам на тото же у дружтве, у хторим жиєме, на першим месце ше нас осудзує пре випатрунок, и жени, дзивки и дзивчата то вчас уча. Позната ци гевта хвилька кед це дахто першираз опомнє най ше намесциш, бо нє пристойне кед дзивка шедзи зоз розширенима ногами. Чом?
Чом способ як я шедзим дакому спричинює ласцивни думки? То проблем у мнє, чи у тей особи хтора ше на мнє припатра?
И чом вообще я як дзецко, котре ма 8-9 роки, можем у дакому спричинїц таки думки? Е, то єдно з тих вельких питаньох коло обєктивизациї жени и дзивки. Одразу поставаш якишик сексуални обєкт, цошка цо други обачели, бо ци ше цело меня, алє ти то нє видзиш так.
Хто треба же би ту превжал одвичательносц и одлучел же то нє у шоре? Шицки, а, поготов, ми одроснути хтори знаме яки уплїв маме на младих. Култура нам полна зоз темами о красоти и сексипилу. У Америки маю змаганя toddlers and tiaras, на хторих участвую дзивчата од 3 до 5 рокох за найкрасше дзивче. Маме и мис швета, и у хлопскей и женскей катеґориї, алє тоти модели часто поставаю тема вишмейованя и мимох же су глупи. Нажаль, тоти змаганя нє указую рижнородносц людского искуства, анї випатрунку, алє вони вше єдна специфична „фела” людзох хтори нє випатраю реално. Ридко хто так випатра у правдивим живоце, а ище ридше без пластичней хирурґиї. Но, то нє значи же ше нє шмеме прикрашовац и облєкац себе по смаку. Сцем повесц же тоти змаганя кладу увагу знова лєм на тото вонкашнє, хторе даєдним тирва кратки час, а за даєдних анї нє постої у таким смислу, бо їх випатрунок нїґда нє будзе спадац до таких зарамених нормох.
Нє знам за це, алє я волїм буц своя, а нє якашик фурма хтору хтошка други здумал и хтору треба виполньовац.
И на концу, цо бим вам могла повесц? Думайце на себе, зоз свою главу, а кед вам дацо завадза – нє треба церпиц, кед вас нє послухаю родичи, можебуц вас послуха даєдна професорка, пайташка, лєбо сушеда. Нїґда нє знаш при кому можеш найсц потримовку, и вше ю треба глєдац од тих до хторих маме довириє. Шицки правиме даяки гришки и дакеди ше „опечеме”, алє то нє значи же треба буц цихо и церпиц. И як Яна Орсолич гвари:
Лєм нїжно ґу себе.