РУСКИ КЕРЕСТУР – После змаганя за найкрасши глас, вчера 26. юния, отримана и друга часц змагательней програми Червеней ружи – Змаганє нових композицийох у забавним духу, на хторей виведзени дзевец нови композициї, а потим и ревиялна часц хтора того року пошвецена Юлиянови Рамачови Чамови, нашому визначному музичарови.
Так, награду за найлєпши тект достал Дориан Чизмар за писню Од салашу по белаве морє, награду за найлєпшу композицию достала Кристина Афич за шпиванку Наш швет, док награду за найлєпшу интерпретацию на тогорочней Ружи достала Ивана Чордаш з Нового Саду, за писню Памятки.
У спомнутих трох катеґорийох, змагали ше нашо уж, преважно, афирмовани шпиваче у дзевец точкох, а то були – Юрай Судї, Саня Дивлякович, Кристина Афич, Мирослав Малацко, Ивана Чордаш, Марина Роман, Иґор Папуґа, Антонела Надь и ґрупа Ария, у чиїм составе Кристина Афич, Наташа Колесар, Дорика Емейди и Марина Роман. Шпивачох провадзел Фестивалски оркестер, а авторе аранжманох композицийох – Мирослав Пап, Боян Милинкович, Ервин Малина и Федор Рушкуц.
Важни задаток оценїц наступ шпивачох и додзелїц пенєжни награди, мал и жири у чиїм составе були: Мирослава Даждиу, Ясмина Дюранїн и Тат’яна Фейди.
Музична руководителька Змаганя нових композицийох у забавним духу була Олеся Балач, а руководителька програми Ребека Планчак.
Ревиялна часц програми того року була пошвецена Юлиянови Рамачови Чамови, нашому визначному музичарови, композиторови, аранжерови, дириґентови и музичному фаховцови, а з нагоди 40 рокох роботи у Доме култури, кельо би того року означел.
Юлиян Рамач, як визначене на програми, компоновал коло 100 шпиванки – 40 нови руски композициї у народним духу, коло 15 у забавним и коло 45 шпиванки за дзеци. За нїм осталии числени аранжмани, авторска музика за театрални представи, коло 50 сонґи за представи и инше.
Даєдни з шпиванкох за хтори вон написал мелодию, або и аранжман, а хтори були виведзени на вчерайшей Ружи були – Студзенка, Руски коренї, Гварел ши ми же одходзиш, Млада руска андя, Одходза младосци з очох, Свадзебни дзень, Паприґарска и Єшеньски нємири, а интерпретовали их – ґрупа Ария, Саня Дивлякович, Борис Маґоч, Ана Римар Симунович, Анамария Регак, Мирослав Малацко, як и Женска и Хлопска шпивацка ґрупа Дома култури Руски Керестур. Шпивачох провадзели Народни оркестер Дома култури Руски Керестур, хтори ноши мено праве – Юлиян Рамач Чамо, а з хторим вон роками руководзел, як и Фестивалски оркестер.
Руководителє ревиялней часци програми були Кристиян Няради и Олеся Балач, а през цаловечаршу програму публику водзели Адриана Надь Барна и Андрей Орос.
Нєшкайши дзень, собота 27. юний, предвидзени за другу часц фестивалу, односно за програму за наймладших Червене пупче, хторе почнє на 18 годзин. У ревиялней часци, публика учує пейц шпиванки хтори будзе провадзиц керестурски бенд Woman power, а за остатнї сеґмент Фестивалу заплановани наступи фолклорних ансамблох зоз наших местох, хтори наступя од 20 годзин.
