РУСКИ КЕРЕСТУР – Валалчанє хтори биваю коло беґельчика КЦ 3, хтори познати як Стари беґель хтори ше находзи коло улїчкох Ґабра Ороса и Якима Салонтая, остатнї два тижнї ше поносовали на смрод и високи над.
Потим як є пред даскельома роками подполно вичисцени и отримовани, валалчанє хтори ше явели до нашей редакциї визначели же беґельчик ознова почал шмердзиц и таки є зароснути зоз надом же скоро нє видно анї хижи.
Проблем на вецей заводи приявйовани до одвичательних институцийох та пондзелок, 22. юния пришол баґер Явного водопривредного подприємства „Води Войводини” и покошел бент, а на пондзелок придзе и одвичательна особа зоз того подприємства же би ше направелo конкретни план тарупираня наду, його винїманя и одвоженя.
Проблем правя и пси блукаче хтори ше там змесцели, уходза людзом до заградох и оганяю преходнїкох. Нажаль, тот проблем нє нови у валалє, алє пре пополнєносц капацитетох у азилу у Кули, зоз Месней заєднїци Руски Керестур апеловали же би кажде мерковал на свойо пси, же би ше их нє вируцовалo на улїцу и здогадли же стерилизация псох у азилу у Кули безплатна.
