РУСКИ КЕРЕСТУР – Стара школа у Руским Керестуре свойочасово була главне место за спортски збуваня, медзитим зоз вибудову Школско-спортскей гали у Руским Керестуре шицки спортски активносци и тренинґи премесцени до гали. У Старей школи през рок нєт активносци, окрем влєце кед ше там отримую турнири у малим и фодбалу 3 на 3. Того року турнир у малим фодбалу почнє першого викенду у юлию, а уж длугши час тирваю пририхтованя.
Прешлого року, члени ФК „Русин” и млади зоз Здруженя гражданох „Пакт Рутенорум” попораєли Стару школу, вивезли шмеце, заменєли осиґурачи за рефлектори и грушочки, покошели траву, вимили и позаметали зоблєкальнї, а понеже облаки були вивалєни положели на нїх древени плочи, а тиж положели и нови ланци и клатки и позамикали просториї.
З оглядом на тото же перши тогорочни турнир нєодлуга почнє, кед орґанизаторе пошли опатриц замерковали же клатки порезани, облаки повибивани, шмеце розруцане по зоблєкальньох а шкатула за струю розбита, прецо може дахто и настрадац, а подобне искуство нам потвердзели и орґанизаторе турнира 3 на 3. Нє покраднуте нїч, понеже анї нєт цо украднуц, алє вандализем очиглядни.
Зоз Месней заєднїци нам гварели же су упознати зоз тим проблемом, хтори з рока на рок вше векши, и же ше роби на ришованю, а перши крочай будзе же ше пре безпечносц виключи струя и будзе ше уключовац лєм по потреби же би дахто нє настрадал. Тиж апеловане на шицких хтори там ходза же би ше одвичательно справовали и нє правели чкоду.