Док векшина людзох хаснує заграду же би у нєй посадзели овоц и желєняву, Михайло Тиркайла зоз Руского Керестура одлучел вибудовац цошка цалком иншаке – викопал рибалов дзешец ари до хторого уложел мешаци планованя и роботи, тисячи цегли и нє таки мали пенєж. Заробок му, гвари, нє бул главни циль, алє направиц свою малу оазу мира и доказац себе же тото цо задума, зна и може витвориц.
Михайло припознава же нїґда нє бул анї рибар, анї даяки аквариста, а анї му риба нє була барз блїзко при шерцу, гоч гвари же о хованю риби роздумовал на даскельо заводи. Першираз, кед купел польопривредну жем при керестурским рибалову, медзитим, кед ше розпитал о трошкох його вибудови, заключел же би му тота парцела була велька за укладаня, а мала за даяки озбильнєйши заробок, та од тей идеї одустал. Но, стара задумка го ознова почала „корциц” кед ше му о даскельо роки указала нагода купиц бочну заграду.
– Понеже сом вираховал же шицко будзем робиц сам и же так будзем мац менши трошки, одлучел сом направиц менши рибалов у загради. Раховал сом и же заробим з того, гоч главна задумка була же би ми то бул лєм гоби – почина Михайло Тиркайла о тим як му вообще пришла така идея на розум.
Складанє цеглох найчежша часц роботи
Велькосц його парцели 17 ари, а сама вода на поверхносци на коло 10 арох. Глїбина рибалова од 120 до 140 центи, и ма коло 1.300–1.400 кубики води. Роботи, приповеда наш собешеднїк, почали вєшенї 2024. року, кед му у загради з гушенїчаром направени бенти, а после ище даяких менших преправяньох почала главна и найчежша робота – обкладанє рибалова з цеглу.
– Понеже риба у води барз активна, вше длобе до бенту, и так валя глїну, то би ше за 3–4 роки погубело. Прето сом надумал цали рибалов обложиц зоз цеглу, та сом купел скоро 15.000 старей цегли. Шицко сом робел сам, без малтеру, без даякого стабилного материялу. Цеглу сом нє складал на сподок, лєм збоку, и гоч тота робота наисце нє була лєгка, можем повесц же вредзело, бо бенти остали цали. Цегли сом почал складац даґдзе вєшенї 2024. року, а шлїдуюцого року у фебруару сом уж почал пущац воду. Воду пущам зоз студнї хтору мам вибиту у овоцнїку. Скоро два мешаци ми кажди дзень вода нєпреривно чурела же би ше наполнєло рибалов. Но, я тоти 1300–1400 кубики води напущал за даскельо днї, алє понеже вода одходзела, мушел сом чекац же би ше жем зоз ню засицела. И през рок сом вец по даскельо годзини дньово досиповал води, а то, у сущносци, риби одвитує, бо ше так стаємно додава швижу, чисту воду – толкує вон.
Потьку до рибалова першираз пущел у априлу прешлого року, кед мала од 500 до 700 ґрами. Цали час осторожно провадзел як напредує та, як заключел, рок бул успишни, з оглядом на тото же за даскельо мешаци од тей чежини, риба мала три, односно штири кили по фалату.
– Кед сом кармел рибу, єдзенє сом єй звекшовал поступнє. Спочатку сом ю кармел зоз, поведзме, єден одсто єдзеня од вкупней маси риби хтору сом мал у рибалове, а вец ше тот процент звекшовало. У лєтним периодзе, кед риба активно є, карми ше ю зоз три одсто од єй вкупней маси. Кед сом, поведзме, у єдней хвильки мал 500 кили риби у рибалову, а кармел сом ю зоз три одсто єй маси, мушел сом єй сипац коло 15 кили єдзеня дньово. Муши ше провадзиц як риба напредує, нє шме ше превершиц, бо знаю настац одредзени хороти, алє и прето же кед єдзенє останє у озеру и почнє препадац, киснуц, так ше стваря амонияк хтори нєвигодни за рибу – толкує власнїк рибалова.
И качки и гуски помагаю у розвою риби
Попри потьки, на своєй парцели Михайло Тиркайла хова и гуски и качки, чий вируток то природне єдзенє за рибу, а воду зоз рибалова хаснує за залїванє овоцнїка зоз кайсами. Ґу тому, живина доприноши и розвиваню планктонох у води, хтори тиж барз важна компонента води у хторей жиє риба, понеже вона нє напредує у стерилней води.
Рибалов важне стерилизовац
– През жиму, кед випражнїм рибалов, я го стерилизуєм зоз гидрантним вапном, алє ше так знїщує и планктони хтори нєобходни. Прето, вяри, кед знова треба усипац чисту воду, часто ше кладзе прегнїти гной, чи хлївски чи уж яки, и ту ше планктони почню ознова розвивац. Стерилизация барз потребна, бо риба у остатнї час ма свойого природного нєприятеля – вирус герпес за хтори нєт лїка. Ґу тому, кед ше з рока на рок нє пременї воду, настанє таке як гной хтори троши оксиґен, а то и чкодзи риби, та прето нє ма приємни смак – потолковал на концу Михайло Тиркайла.
Жимовнїк ше зда през цали рок
Прешлого лєта Михайло направел такволани жимовнїк, односно вибетоновани, отворени базенчок, у хторим риба дочасово змесцена док ше ю нє преда. Понеже у нїм зна буц превелька концентрация риби, воду ше муши нєпреривно ошвижовац, та купел и компресор хтори додатно уноши оксиґен.
– Тот базенчок ми оможлївює же бим ю, кед дахто придзе купиц рибу, лєгчейше могол лапиц, понеже то з рибалову нє так лєгко, алє и же бим вше мал єдно количество риби видвоєне, кед ше ю нє так часто предава. Жимовнїк ма дзевец метери длужини, два метери ширини, и 1,80 метери висини, єст вецей як 30 кубики води и зоз добру аерацию до ньго мож положиц тону риби, а то ми цалком досц – толкує вон и додава же тей жими першираз и предавал рибу.
– Цо ше дотика цени риби, нє була у тим максималним досягу як цо була пред даскельома роками, кус спадла, алє можем повесц же було цалком добре. Цена риби варира зависно од часци рока, вєшенї є найвигоднєйша, док є влєце, кед рибу найчежше чувац, кус драгша.
Заш лєм, гвари, кед спатри вкупни трошок вибудови рибалова, нє рахуюци власну роботу, анї сам нє зна чи ше таки гоби виплаци.
– Сам себе сом здумал афоризем же сом уж тельо пенєжи уложел до того „проєктуˮ, же сом по конєц живота могол мац приготовену рибу у ресторану – гвари Тиркайла през франту. Медзитим, як толкує, пенєж му анї нє бул главни циль. По фаху електроинжинєр, вше любел виволаня и идеї хтори на перши погляд випатраю комплексни же би ше их витворело.
– Мнє то було таке як виволанє, же я то сцем и можем. Думам же нє вредзи анї споминац кельо тото шицко коштало, бо коштало досц. Питанє за кельо роки ше враци уложене. Требало би положиц на папер и кельо сом точно риби предал, кельо коштала, кельо сом уложел до єдзеня, кельо ми чистого остало того року, и кельо роки ми будзе требац же бим врацел уложени пенєж. Ту єст приходу, нє так же нє, алє мнє ище векши „ґуштˮ кед себе влєце коло рибалова, под кайсу, положим карсцель за лєжанє за плажу, як на морю… Коло рибалова мам овоцнїк кайсох, вечар себе уключим рефлектор, а на рибалову мам и животиньки – поцешено приповеда вон, визначуюци же праве тота живина доприноши .е би заварта природна еко-система була ище лєпша. И праве у тим, можебуц, права вредносц його нєзвичайного проєкту – нє у килох предатей риби, алє у миру хтори пренашол так блїзко – у загради споза своєй хижи.
