Пред коло дзешец, та и вецей роками було барз мало майстрох котри меняли тапацирунґ у нукашньосци авта, та аж и „нєба” у нїм. Тото обачел и наш собешеднїк котри ше лапел до тей роботи на першим месце пре любов ґу превозком, а окреме ґу автом.
Йоаким Раґаї, познатши як Яшко, вецей як дзешец роки робел як помоцни, а вец и як главни кухар у даскелїх ресторанох, у Дюрдьове, Темерину, Новим Садзе и Зренянину, а вариц почал пре любов ґу єдзеню и його пририхтованю. Медзитим, кед ше засицел тей роботи и кед ю почал доживйовац як терху, одлучел же почнє робиц дацо инше.
– Нє проблем ми пременїц роботу, думам же важне знац цо сцеш и цо можеш, алє сом вше за тото же треба пробовац. Таки сом. Нє побановал сом анї раз, и кед ше ми указала нагода научиц меняц горню тапацирану часц у авту, односно „нєбо”, нє одбил сом. Попачело ше ми и остал сом ше учиц и помагац майсторви у Новим Садзе. Дзекуюци йому сом постал приватни поднїматель, нагло, так повесц „прейґ ноци”. Случело ше же сом теди, пред вецей як штернац роками, пошол поряднє на роботу и мал сом цо видзиц. У роботнї дзе зме робели нє було машини, анї авта, нїчого. Шицко було празне. Остали лєм даскельо нєпреблєчени шедовиска од авта и длуство, бо сом за майстра на свойо мено куповал платно за роботу – памета майстор Раґаї тот нємили случай. И попри тим же остал без виплаценей плаци, одважел ше и почал сам робиц. Виплацел длуство у дутяну за платно, и предлужел з нїма успишно сотрудзовац.
Роботня у Дюрдьове и у Новим Садзе
Так наш собешеднїк пред тринац роками почал тапацирац нукашньосц автох, перше „нєбо”, а з часом преширйовал роботи и почал тапацирац и нукашньосц, односно шедовиска и други часци котри мож тапацирац и цалком „преблєчиц”.
– До пред даскельома роками було барз мало майстрох котри меняю „нєбо” у авту. Тераз их уж єст вецей, алє, заш лєм, нє може то кажде робиц. Гоч до тей роботи нє треба вельо укладац, особа котра таке роби муши мац вельо сцерпеня и сцелосци. У тей роботи єст барз вельо дробнїци, потребна прецизносц у знїманю и врацаню часцох, понеже ше медзи платном и плехом од авта находза вельо дробни часци котри мож погубиц, страциц, зламац док ше их знїма, або на концу – треба знац шицко врациц на место. Я таки же кед ми чежки дзень, кед ше нє можем сконцентровац, нє робим. Найгорше кед ше лїпи платно, и кед ше лєм дакус баржей прицишнє, будзе видно, нє будзе так добре поробене як я сцем. Познате же горня часц у авту, тото „нєбо” хторе споминам, барз ровне и на нїм видно кажди милиметер, кажду гришку, бруд, випупченє – гвари наш собешеднїк и припознава же праве тоту часц найчежше меняц на Ґолфу 5, а то лєм прето же є фабрично подло поробени. А, як упрекосц, кед у єдним тижню на осем автох пременї „нєбо”, од того сиґуно пейц авта Ґолф 5. Як час преходзи, гвари же нєшка вше частейше меня праве тоту часц на Ґолфу 7, понеже шицки тоти Ґолфи маю исту хибу, а то подли тапацирунґ у нукашньосци авта. Як приватнїк Яшко перше почал робиц у своїм обисцу у Дюрдьове, понеже там мал барз добри условия. На валалє вельки двор, хладок, закрице над главу… Од початку ше притримовал того же шицки котри з нїм сотрудзую, треба же би знали же точносц и почитованє термину важни. Та так ище вше, муштерия ма обовязку пригнац авто до його роботнї звичайно на 9 годзин рано, а вон, у поради зоз власнїком, планує закончиц роботу исти дзень, то углавним вше коло трох пополадню. Дакеди, кед авто єдноставнєши, кед нє ма вельо часци за знїманє, гвари же роботу и скорей пороби, алє нїґда нє понагля, бо є свидоми же у його роботи прецизносц барз важна.
– Тот хто ми нє приженє авто по 9 годзин, як порадзене, муши заказац други термин, бо од 9 годзин рано, кед нєт нїкого, починам робиц дацо инше. Час ше муши почитовац. Знам же нам шицким авта барз важни и же нам их треба кажди дзень, прето ше притримуєм того же авто котри рано ту, закончим исти дзень. Случи ше, алє ридко, же ми ше тото нє уда, та вец наволам власнїка и повем же кеди ма присц.
Мушим припознац же хлопи лєпше отримую авта. То видзим накадзи ми приженю авто до двора, такой знам чи власнїк жена, чи хлоп – гварел майстор.
Доживотна ґаранция на роботу
Кед розробел роботу, а понеже ма муштериї зоз шицких крайох Войводини, та и околних державох Сербиї, почал робиц и у Новим Садзе. Оценєл же так будзе єдноставнєйше и лєпше.
– Швидко сом нашол простор у варошу, так же нє було почежкосци, а нє спомнул сом же на мою покончену роботу, на тапацирунґ нукашньосци авта давам доживотну ґаранцию, и наисце нє франтуєм. Хаснуєм квалитетне лїпкаче, а то барз важне. Єст и туньши, алє з нїма нє сцем робиц. Нє чежко ми найсц материял, и платна єст дзе купиц, наисце вельки и добри вибор. Нє було так скорей, шицко тото нє було доступне, и чежко було найсц тото цо нєшка нє проблем. З єдного боку то и пре цену и прето же вельо того нє було на тарґовищу. Найважнєйше ми же бим мал добру комуникацию з муштерию и же би на концу були задовольни зоз поробеним. Знам же реклама кед вас препоруча, найлєпша – гварел майстор котри ше найвецей рекламує на своїм Фейсбук профилу Jasko-Auto neba Jasko и на Инстаґарам профилу auto_neba_novi_sad_djurdjevo, дзе поставя слики автох и детальох котри поробел. Пре старши ґенерациї, з часу на час друкує рекламни флаєри и дзелї их же би и вони чули за ньго, мали його контакт, алє и видзели цо роби. Попри тапацираня наш собешеднїк фарби и пластични часци авта, та аж и шиє по жаданю „сукньочки” за меняч и ручну гамовачку.
Авто марки Волво XС90 вецей раз по тераз тапацирал, и гвари же є барз чежки за роботу.
– Тот авто ма барз вельо часци котри барз чежко розклопиц и врациц на место. Док меням „нєбо”, случує ше и таке же ше даєдни часци, углавним од старосци, або з подлого материялу, розпадню. Прето сликуєм и о шицким информуєм власнїка.. Интересантне тото же велї мойо муштериї кед им ше нєбо одлїпи, такой заджобню ґомбошки и часто очкодую струю, або дацо друге на авту. Прето, кед берем авто, вше перше попреверюєм чи одредзени часци як треба. Наприклад 307 под тапацирунґом, под нєбом, ма одводни циви, та кед ше их преджобнє, чури вода и велїм нєясне одкадз тота вода – гварел Раґаї и предлужел же найинтересантнєйши авто котри робел бул Тунинґ, котри и звонка и знука поробени на тему рисованого юнака Стича.
Майстор Яшко з часом почал меняц и други тапацирани часци у нукашньосци авта, та сотрудзує зоз єдну шнайдерку зоз Жаблю. Потераз тапацирал нукашнї часци на комбайну, у камиону, та и на других роботних машинох, аж и у трактору, понеже даєдни польопривреднїки сцу мац лєпшу звучну и цеплотну изолацию. Гоч у тей своєй роботи муши нєпреривно учиц, и пре материяли, алє и пре нови превозки, майстор Яшко гвари же нїґда нє побановал же вибрал праве тоту роботу.
