РУСКИ КЕРЕСТУР – У Основней школи „Петро Кузмяк” у Руским Керестуре школяром од першей по штварту класу и їх учительом вчера приказана бабкарска представа з тему защити, одн. зменьшованя ризику од елементарних катастрофох, як часц проєкту Националного Каритасу Сербиї.
Представа з меном „Герман глєда свойо страцене коритко” у Керестуре виведзена у рамикох промотивней и едукативней кампанї, а з нагоди 13. октобра – Медзинародного дня зменьшованя ризику од елементарних нєпогодох.
Як за Рутенпрес виявела директорка деканатского Каритасу у Новим Садзе Анита Ґовля, у рамикох того проєкту и з нагоди спомнутого дня, кампаня тирва уж два тижнї у шицких наших местох дзе роби Каритас. У Керестуре виводзенє представи орґанизоване у сотруднїцтве з Националним совитом Руснацох.
У представи на сербским язику ґлумя Каритасово волонтере, а у Керестуре свойо гласи бабком пожичели Ясна Бризар („Герман”), Анита Ґовля („Пинокио”) и Наташа Макаї Мудрох („Елементарна нєпогода” и „Коритко”).