БЕОҐРАД – У Беоґрадзе стреду, 7. юния, отримани сход з нагоди закончованя проєкту „Потримовка унапредзеню людских правох и нулта толеранция за дискриманицию”, хтори финансує Европкска уния пре унапредзованє и применьованє релевантних законских рамикох за защиту од дискриминациї, защиту правох националних меншинох и унапредзенє роботи бранительох людских правох и їх гармонизованя з европскима стандардами. Проєкт потримали Влада Републики Сербиї, Поверенїк за защиту ровноправносци, Канцелария за людски и меншински права, Инстут „Лудвик Болцман” и Република Словения.
На презентациї, на хторей спред Националного совиту Руснацох присуствовала членїца його Роботного цела за родну ровноправносц Єлена Перкович, визначени посцигнути резултати у тророчним тирваню того проєкту, а податки о тим дати и у окремней публикациї.
Резултати и значенє проєкту презентовали о.д. директора Канцелариї за людски и меншински права др Сузана Паунович, Поверенїца за защиту ровноправносци Бранкица Янкович, шеф сектору операцийох Делеґациї ЕУ у Сербиї Николас Бизел, амбасадор Австриї у Сербиї Йоганес Айґнер, економски совитнїк у Амбасади Словениї у Сербиї Ґоран Криж, наукови директор Институту „Лудвиґ Болцман” проф. др Ганс Третер и директор Канцелариї за национални меншини Словениї Стане Балух.
Як у звоїм звиту з того сходу винєсла Перковичова, главна порука же з применьованьом того проєкту у Сербиї у єдней мири зменшани случаї дискриминациї, алє нєдостаточно. Препоручене же треба добре препознац случаї дискриминациї, окреме на локалним уровню, и за тото едуковац державних службенїкох, занятих у правосудних орґанох, полицайох. Єден з резултатот проєкту и же виробени препоруки за виробок Статеґиї за превенцию и защиту од дискриминациї.
Визначене же з тим проєктом змоцнєти капацитети орґанох за защиту людских правох и борбу процив дискриминациї, алє же и надалєй треба участвовац у проєктох хтори препознаваю дискриминатирни справованя спрам рижних загрожених ґрупох, як цо то Роми, Албанци, инвалиди, меншински етнїчни ґрупи, ЛҐБТ-популация, миґранти, а окреме у тих хтори упутюю на дискриминацию у обласци роботних одношеньох.
Тиж поведзене же треба розвивац таки стандради антидискриминацийней политики яки пестую жеми-членїци ЕУ.
