РУСКИ КЕРЕСТУР – Лєтня школа у Попрадзе, у Словацкей Републики, на котрей од 2–8. юлий пребували 27-еро школяре котри виучую руски язик з елементами националней култури як виборни предмет и школяре з порядней настави з вецей наших местох, успишно закончена
Орґанизатор и координатор активносцох у мено Националного совиту (НС) Руснацох бул предсидатель Вивершного одбору НС Руснацох Желько Ковач котри визначел же шицко цо заплановане у подполносци и витворене, а уж убавени тим наставнїкох котри преподавали дзецом задовольни зоз посцигнутим.
До Попраду одпутовали седмеро викладаче – наставнїци руского язика Каролина Папуґа и Сенка Бенчик, о. Владимир Еделински Миколка котри викладал виронауку и историю, наставнїк ґеоґрафиї Дарко Бобаль, информатику тримал Далибор Болдиш, музичне Сашо Палєнкаш, а за рекреацию бул задлужени Деян Будински.
Национални совит финансовал трошки змесценя, єдзеня и осиґураня, прейґ Одбору за образованє, a по конкурсу з Покраїнского секретарияту за образованє обезпечена часц драгових трошкох у виносу од 70 000 динари. До єшенї ше обчекує ище 100 000 по тей основи, а першираз, по одлуки Одбору за образованє, и школяре плацене часц трошкох у виносу 2 500 динари.