НОВИ САД – Вчера вечар, 20. децембра, у Руским културним центру у Новим Садзе, отримана уж традицийна дзецинска крачунско-новорочна манифестация „Пахулька”.
Школяре младших класох, хтори у своїх основних школох у Новим Садзе факултативно уча руски язик, зоз пригоднима стищками и шпиванками обрадовали вельочислену публику. Свой наступи им помогли пририхтац їх учительки Ана-Мария Рац и Оля Яковлєв, а музични точки Владимир Сивч.
На самим початку „Пахульки”, вихователька Александра Колбас помогла малим оводашом хтори ходза на руски язик до „Палчочки” же би указали цо шицко научели, а у програми, привитуюци наиходзаци швета, шицки дзеци одшпивали два коляди.
На самим концу веселей манифестациї, хтору водзела Фиона Грубеня, ґу вредним новосадским школяром пришол Дїдо Мраз и подзелєл им дарунки.
