СУБОТИЦА – У Суботици вчера, 10. юния, отримана перша схадзка Координациї националних совитох (НС-ох) у Сербиї под предшедованьом НС Мадярох, односно його предсидателя мр Єне Гайнала, а як за Рутенпрес гварел предсидатель НС Руснацох Славко Рац, присуствовали предсидателє, лєбо представителє 17 з 21-ого НС-у у Сербиї.
На схадзки за подпредсидателя Координациї НС-ох вибрани предсидатель НС Румунох Даниел Петрович, прилапени вименєни Принципи роботи Координациї, а з дзепоєднима новима членми дополнєни и єй фахово роботни цела.
Як гварел Рац, бешедоване и о тогорочним нєфинансованю националних театрох Румунох, Словацох и Руснацох з ресорного секретарияту Покраїнскей влади, и заключене же ше до ришованя того проблему уключи и Координация НС-ох, же би ше зоз заєднїцким наступом при покраїнских орґанох винашло одвитуюце ришенє за тогорочне и будуце финансованє националних театрох националних меншинох у Войводини.
На схадзки Координациї поведзене и же меншини жадаю баржей участвовац у приступних прегваркох з ЕУ, за цо тиж потребни заєднїцки наступ НС-ох, а ґу тому, поведзене же будуце место и улога националних совитох ма буц одредзена з новима законами о людских правох и новим законом о националних совитох.