Литературни вечар на „Петровским дзвонє”

автор ссб
1.1k Опатрене

ПЕТРОВЦИ (ГОРВАТСКА) – У рамикох 44. Културней манифестациї „Петровски дзвон” всоботу, 3. юния, у Петровцох отримани Литературно-музични вечар, а  вечарша програма почала з отвераньом вистави малюнкох з подобових колонийох КУД Руснацох з Осиєку, у просторийох Етноґрафскей збирки.

У сали за схадзки Дому култури отримана промоция виданьох Союзу Русинох Републики Горватскей, та попри Союзового алманаху „Думки з Дунаю” и нового формату дзецинского часопису „Венчик”, представени и руски преклад кнїжки „Назви рошлїнох и животиньох у руским язику” проф. др Оксани Тимко Дїтко и двоязична, руско-горватска збирка поезиї Владимира Провчия, з назву „Запах надїї”.

О спомнутих виданьох Союзу бешедовала їх редакторка Вера Павлович, а о збирки поезиї и сам автор Владимир Провчи.

На Литературно-музичним вечаре у велькей сали Дому култури шейсцеро руски поетове з Горватскей – Владимир Провчи, Томислав Мишир, Ганча Папандриш-Гаргаї, Звонимир Барна, Агнетка Балатинац и Любица Гаргай пречитали свойо твори, а на програми означани и три рочнїци.

Реферат о 240-рочнїци снованя Крижевского владичества пречитал петровски парох о. Владимир Седлак, а з нагоди 90-рочнїци народзеня длугорочней петровскей и новосадскей учительки, културней активистки и сновательки и першей редакторки часопису „Венчик” Вири Гудаковей и 40-рочнїци шмерци економисти, историчара и публицисти др Федора Лабоша, їх биоґрафиї пречитал Томислав Рац.

У музичней часци програми наступела Женска шпивацка ґрупа Дружтва Русинох и Українцох „Калїна” з Риєки.

Вчера на Манифестациї отримани музично-танєчни програми „Петровски дзвончок” и „Петровски дзвон”, а Културна манифестация закончена з цаловечаршим концертом музично-шпивацкого ансамблу Дому култури Руски Керестур.

ПОВЯЗАНИ ТЕКСТИ