ВЕРБАС – Вчера, 11. мая, у Вербаше отримана конститутивна схадзка Скупштини општини (СО) Вербас на хторей, после звиту Општинскей виберанковей комисиї о отриманих локалних виберанкох 23. априла и їх резултатох, потвердзени мандати 36 одборнїком зоз шейсц виберанкових лїстинох, кельо и участвовали на виберанкох.
Векшину у вербаским локалним парламенту творя Сербска напредна странка (СНС) зоз 17 одборнїками, Социялистична партия Сербиї (СПС), хтора ма 8 одборнїкох и Сербска радикална странка (СРС) зоз двома одборнїками.
Коалиция „Ошлєбодзме Вербас” (Демократска странка, Социялдемократска странка и Лиґа социялдемократох Войводини) у СО Вербас ма штири одборнїцки мандати, Рух социялистох три и два манадати Ґрупа гражданох „Досц було-Саша Радулович”.
За предсидателя СО Вербас вибрана Маряна Мараш зоз СПС, котра тоту длужносц окончовала и у прешлим зволаню, а за заменїка предсидателя СО вибрана Мартица Тамаш зоз СНС. Тамашовей, котра на виберанковей лїстини СНС була на 21. месце, одборнїцки мандат потвердзени понеже пецеро одборнїки з лїстини СНС вибрани на функциї у Општини и Општинскей ради, а єдна одборнїца дала задзекованє на одборнїцке место.
За предсидателя Општини Вербас знова вибрани Милан Ґлушац зоз СНС, а за його заменїка Миляна Штулич, тиж зоз СНС.
До Општинскей ради Општини Вербас вчера вибрани др Ґоран Дюрович, Марян Миянович, Даниєла Илич, Срдян Станич, Дамир Иванич и Данило Мараш зоз СНС, Марко Новакович зоз СРС и Ґоран Пейович и Боян Периз зоз СПС.
Одборнїца з лїстини Коалициї „Ошлєбодзме Вербас” Ясмина Долапчев на схадзки виявела же у локалним парламенту будзе наступац як самостойни одборнїк Демократскей странки.