Нащива оглядним польом на „Дньох керестурскей паприґи”

автор мар
1.1k Опатрене

РУСКИ КЕРЕСТУР – На самим початку тогорочней Туристично-привредно-културней манифестациї „Днї керестурскей паприґи”, заинтересовани нащивителє мали нагоду обисц оглядне польо у Чизмарових, и опатриц паприґу и нову механїзацию котру представел млади параст Мирослав Ковач.

На оглядним полю у Чизмарових, три компаниї – „Аґроарм”, „Тимак Аґро Балканс” и „Белшим Кроп Протекшн” представели заєднїцке сотруднїцтво, як и потенцияли гибридней червеней роговей паприґи „Каптур”, поровнуюци ю з комерциялну сорту „Слоново ухо” котру домашнї ховаю самоинициятивно, алє з цалком истим третманом.

Спред „Аґроарм-у” Ранко Нєґован привитал госцох и нащивительох, и гварел же тот рок нє идеални за паприґу, алє ше заш лєм обчекує урожай од два килоґрами по копиню з їх гибрида. Йосип Береш, з компаниї „Тимак Аґро Балканс”, дзечнє дзелєл совити о основним гноєню з штучнима гноями, а и визначел предносци применьованя адекватних формулацийох у розличних розвойних фазох.

19-8-2017-Dnji paprigaroh I casc 003

Инжинєр защити рошлїнох з „Белшин Кроп Протекшн” Владимир Васоєвич тиж бул отворени за консултациї и совитованя з парастами а, медзи иншим, спозорел на нєпотребне и нєадекватне применьованє фунґицидох. Як поведзене, на оглядним полю хасновани три фунґициди и єден инсектицид.

Друга часц виходу до хотара була до младого паприґара Мирослава Ковача, котри представел власни продукти, т. є. механїзацию з котру олєгчал продукцию – пирскачку на котру доправел єднобочне кридло, цо му оможлївело пирсканє з дильова, же би нє мушел исц през паприґу. Попри тим, представел и траку за оберанє паприґи, на котру оберачки такой кладу плоди, елеватор их цага платформу, а на нєй ю роботнїки такой класую.

Нащивительох и фаховцох було з цалей держави – з шицких околних местох, Нового Саду, Беоґраду, Пироту, Парачину и Лесковцу, цо лєм потвердзує же ше за керестурску папруґу чує надалєко. З оглядом на цеплу хвилую, на обидвох оглядних польох було порихтане ошвиженє под закрицом у хладку.

(Вецей фотоґрафиї поставени у нашей фотоґалериї)

19-8-2017-Dnji paprigaroh I casc 028

 

ПОВЯЗАНИ ТЕКСТИ