Почина Тидзень музейох

автор вев
815 Опатрене

НОВИ САД – Пияток, 11. мая, у Музею Войводини, отримана конференция за новинарох з нагоди початка Mанифестациї „Музеї за 10”, хтора будзе отримана од 14. по 20. май.

О збуваньох у Новим Садзе у Тижню музейох, бешедовал директор Музея Войводини др Драґо Нєґован. Вон, медзи иншим, надпомнул же ше у Новим Садзе до тей Манифестациї „Музеї за 10” уключели 11 институциї и орґанизациї.

Покраїнска секретарка за културу, явне информованє и одношеня з вирскима заєднїцами Драґана Милошевич, гварела же тота манифестация швето музейох, и пожадала же би нащивеносц була велька. Визначела и же того року участвую музеї по цалей Войводини, и вецей як 80 музеї у цалей Сербиї.

Манифестация „Музеї за 10” у рамикох Тижня музейох облапи и два значни медзинародни датуми – Медзинародни дзень музейох (18. май) и Европску Ноц музейох (19. май), кед дзвери шицких музейох буду отворени цалу ноц, гварел Славко Спасич, спред орґанизацийного одбору, а источашнє є и предсидатель Националного комитету медзинародного совиту музейох (ИКОМ) Сербиї. Вон поволал шицких нащивительох най у тим тижню обиду и други места и други музеї, бо у шицких буду орґанизовани рижни интересантни програми.

Управнїца Ґалериї Матици сербскей др Тияна Палковлєвич Буґарски надпомла же того року централна тема гиперповязани музеї, нови приступи, нова публика, вимагала и нови приступи и нови змисти же би були интересантни публики.

У Тижню музейох участвує вецей як 80 музеї и подобни институциї у 46 городох. У безплатних програмох буду приказани вецей вистави, презентациї, роботнї, промоциї, проєкциї и подобни змисти.

Покровитель манифестациї „Музеї за 10” Министерство култури и информованя Републики Сербиї, Покраїнски секретарият за културу, явне информованє и одношеня з вирскима заєднїцами и Управа за културу Городу Нови Сад.

ПОВЯЗАНИ ТЕКСТИ