ЗОМБОР – На польопривредних поверхносцох у Заходнобачким округу суша вплївує на урожай, та буду обачлїви пошлїдки на польодїлских и заградкарских културох. Польопривреднїки уж планую тлачиц слунечнїк котрого єст на коло 8 000 гектари, на дзепоєдних критичних парцелох слунечнїк уж витлачени. Обчековани урожай будзе коло 50 одсто менши од просекового.
– У периодзе остатнїх двох мешацох було 30 тропски днї з температуру векшу як 33 ступнї, таки горучави директно вплївовали на урожай польодїлских културох – оценюю фаховци з Польопривредней фаховей служби Зомбор.
– Цалком нєзвичайне же би тлачидба слунечнїку започала у тим периодзе, прето же лєм перша декада авґуста. Високи юнийски и юлийски температури озбильно зменшали урожай – гварел совитодаватель з Польопривредней фаховей служби Зомбор Зоран Боцо.
Польопривредна фахова служба Зомбор ма шейсц автоматски метеоролоґийни станїци, на котри од марца до юлия провадзени паданя, та за пейц мешаци веґетациї спадло лєм 250 литри дижджу по квадратним метеру.
