Препатрам гард диск на котрим чувам зняти материял за емисиї котри сом робела зоз колеґом, направиц би места за нови филми. Ту вибеженци у Беркасове, кадри за емисиї о корупциї, „йоґурт“ револуциї, кадри и вияви зоз наших валалох котри маю проблем зоз воду за пице. Опатрам знїмки зоз валалу у Сриме, нє маю водовод, ту студня у дворе, у студнї кабел. Чловек нам бешедує же анализи указали же вода нє за пице, алє иншакей нєт. Мож куповац або пиц тоту зоз студнї. Людзе з валалу порихтани участвовац, финансовац, лєм кед би власц конєчно одлучела обезпечиц им тото цо би требало буц нормалне у 21. вику – водовод и чисту воду за пице. У медзичаше, почали роботи на вартаню студнї у Соту, а плановане же би у наиходзацих рокох водовод достали и валали котри го потераз нє мали. Рихтаме ше до Европи, шминкаю ше главни городи, даваю ше пенєжи за фестивали, а остаток Войводини сцерпезлїво и у цихосци чека же би на ньго уж раз пришол шор.
Новосадски контейнери, випатра, нєодлуга достаню чуварох. Попри тим же каждого мешаца плациме за одношенє шмеца, тераз будземе плациц и чуварох того истого шмеца. Город Нови Сад видвої коло 6 милиони динари компанийом котри нашо шмеце буду „чувац“ од зазберовачох котри кажди дзень шпортаю по шмецу, винїмаю фляши, картон, пиксли… и одруцени хлєб. Нїби, тоти зазбероваче городу однїмаю вельки пенєж зоз тим же беру секундарни сировини. Правда, зоз рециклажу мож досц заробиц, алє то наисце муши буц ришене на иншаки способи. Кед зме були у Нємецкей, требало нам ше звикнуц роздвойовац одрутки до рижних мехох у обисцу, бо там таки шор, а процес рециклажи почина уж дома. Вец тоти мехи пребера комуналне подприємство и ноши их на преробок далєй. Кед зме одходзели до супермаркетох ношели зме громаду празни пластични фляши котри ше уруцую до апарату при уходзе. Кажда празна фляша коштала пол евра, а апарат видавал паперик на котрим писало кельо фляши уруцени и за кельо евра нам будзе менши рахунок. У тим варошу нїґдзе на улїци нє було видно шмеце, а так и у векшини других местох ушореней держави.
Велї ствари ми тераз нє даю мира – Покля мех зоз шмецом ношим у руки, то мойо власнїцтво та го можем дац кому сцем? А кед го уруцим до контейнера, шмеце престава буц мойо и постава драгоциносц? Яки овласценя тих чуварох? Буду шедзиц при контейнерох чи ше муша шейтац? Буду фотоґрафовац зазберовачох чи им буду питац леґитимациї? Цо поробя кед дакого влапя же гребе по шмецу? Будзе мушиц доказовац же препатра шмеце чи можебуц глєда одруцени мачата, котри „гумани“ Новосадянє пошпурґали до канти? Дзе у тим шицким права гражданох котри жию зоз пребераня по шмецу?
Становиска висловени у тим тексту виключно авторово и нє вше одражую ушорйовацку политику новинох „Руске слово”.