РУСКИ КЕРЕСТУР – У рамикох Културней манифестациї „Костельнїковей єшенї” два найновши кнїжки НВУ „Руске слово” – „На крижней драги” др Янка Рамача и „Мадярска Горнїца” Мирона Жироша – вчера представени и школяром Штреднєй школи, односно руских оддзелєньох Ґимназиї.
У уводней часци програми домашнї школяре ше представели з двома роботами з тему „История Руснацох”, та текст Тадея Малацка пречитала Дорис Бучко, док Кристина Гайдук пречитала роботу хтору написала вєдно з Марияну Виславски.
Наукове дїло др Янка Рамача „На крижней драги” школяром приблїжел його редактор Микола М. Цап, котри визначел же кнїжка бешедує о важним периодзе з историї Руснацох на тих просторох, о чаше од 1918. по 1941. рок, як и же то найзначнєйша ориґинална историоґрафска кнїжка о тим периодзе.
Модератор програми и редактор виданьох Микола Шанта бешедовал о публицистичним дїлу „Мадярска Горнїца” Мирона Жироша, хтора друга часц з циклусу Жирошових виглєдованьох Горнїци, а пречитал и писню „Я паробок Капущан” зазначену у тим дїлу.
З двома рускима забавнима композициями у музичней часци програми участвовали Танита Ходак и Сашо Палєнкаш.