ВЕРБАС – Часц културних змистох на соботовей Централней преслави Националного швета у Вербаше була и вистава диґиталних принтох младей вербаскей уметнїци Кристини Ґшвенґ, хтора отримана у просторийох КПД „Карпати” з назву „Красота задуманей жени”.
На своїх роботох, хтри настали 2013. и 2014. року, Кристина виберала жени, бо, як гварела, женска красота вична инспирация. Як визначела, инпсирацию достала зоз стрипу и филмох, а у своєй дотерашнєй уметнїцкей роботи ше спатрала на уметнїкох Роя Лихтенстайна и Ендия Ворголу.
Першу самостойну виставу младей уметнїци отворел Владо Няради, котри з тей нагоди визначел же таки роботи нєкаждодньово, а конкретни рукопис и рижнородносц мотивох даваю окремни уметнїцки печац Ґшвенґовей. Додал и же виложени роботи представяю критику доминациї кича и трошительней горучки.
Вистава Кристини Ґшвенґ прицагла и младшу публику, а у просторийох Дружтва „Карпати” мож ю опатриц и того тижня.
Кристина Ґшвенґ инженєр веб-дизайну, дипломовала на Ґрафичним одсеку Високей технїчней школи – фаховних студийох у Новим Садзе. Дипломовала з дзешатку, з тему „Поп-арт у сучасней визуалней уметносци”, а дотераз викладала на двох колективних виставох – у Студию М у Новим Садзе и на Ноци музейох у Вербаше.
