НОВИ САД – У року кед ше означує 70-рочнїца од виходзеня часописа „Шветлосц”, тих дньох вишло веб-виданє и другого тогорочного числа нашого найстаршого часописа за науку, литературу, културу и уметносц.
Число отвера блок ориґиналних наукових прилогох, медзи котрима робота др Олега Румянцева „Паоло Румиц о Карпатох, Русинох и руїнох историї” и др Богдана Гальчака „Лемки з Високей Бжози”.
З чечуцей литературней продукциї обявени циклус писньох Ирини Гарди-Ковачевич „У медзичаше” и проза Саши Сабадоша „Дзень за паметанє”.
Рубрика „Зоз шветовей литератури” приноши вибор з поезиї Шандора Петефия „Розкошно квитнє ярня заграда”, котри з мадярского прешпивал Михал Рамач, док у рубрики „Зоз сербскей литератури” обявни вибор з поезиї Стевана Раичковича „Кому дзвони дзвоня”, котри тиж прешпивал Михал Рамач.
У рубрики „З рукописного нашлїдства” обявени прилог Миколи М. Цапа „Нєпознати перши писнї Гавриїла Костельника на українским язику”, у котрим винєшени нови и нєпознати боки з литературней биоґрафиї Г. Костельника.
„Статї и есеї” приноша статю Ирини Гарди-Ковачевич „Паметанє и тирванє” о двох подобових уметнїцох, Гелени Сивч и Лидиї Рамач, чия творчосц представена на тогорочней Централней святочносци Дня Руснацох у Новим Садзе.
„Прикази, критики, рецензиї” информую о нових кнїжкох Янка Павловича и Владимира Кирди Болхорвеса, о котрих пишу Олена Планчак-Сакач и Милица Єфтимиєвич Лилич.
„Драмски додаток” виполнює комедия за дзеци „Васо Пикасо” Сави Шкобича, котру зоз сербского преложел Владимир Бодянец.
Остатнї прилог у часопису „Упутство за пририхтованє рукописох за друкованє”, з котрим Редакция поволує на сотруднїцтво през писанє ориґиналних наукових и фахових роботох з обласци гуманистичних и дружтвених наукох.
Число илустроване з малюнками Гелени Сивч.
Як и шицки дотерашнї, и тото число часописа „Шветлосц” мож опатриц на адреси: www.ruskeslovo.com/шветлосц.