РУСКИ КЕРЕСТУР – У Велькей сали Дому култури Руски Керестур (ДКРК) вчера отримана 56. Општинска смотра музично-фолклорней творчосци, на хторей ше зоз свомї точками змагали доми култури и културно-уметнїцки дружтва з местох кулскей општини.
Керестурци участвовали на два заводи, перше з окремним блоком, а потим и з музичнима точками. У блоку наступел Виводзацки фолклорни ансамбл ДК з танцом „Вечар на валалє” и фолклорна ґрупа ветеранох з „Ильковим танцом”, хторим фахова руководителька Ґабриєла Саянкович. У тим блоку ДКРК наступели и Хлопска жридлова ґрупа з Венчиком руских виходнярских шпиванкох и Мишана жридлова ґрупа з народнима шпиванками „Нє зрубуй, нє сцинай” и „Коняре”.
Спред Дому култури ше поєдинєчно з по двома шпиванками змагали и шпивацки ґрупи и Тамбурови оркестер – Дзивоцка, Женска и Хлопска шпивацка ґрупа, а Тамбурови оркестер одграл Венчик руских шппиванкох. Фахови руководитель шицких шпивацких ґрупох и Оркестру Юлиян Рамач Чамо.
Руске КУД „Др Гавриїл Костельник” з Кули на Смотри участвовало зоз Женску и Хлопску шпивацку ґрупу, котри одшпивали по два руски народни шпиванки, а под фаховим руководительством Еуфемиї Планчак.
Селектор Општинскей смотри бул хореоґраф Любомир Вуйчин з Вербасу, котри одредзел же ше на Зонску смотру пласовали шицки точки Дому култури Руски Керестур, як и Женска шпивацка ґрупа КУД „Др Гавриїл Костельник” з Кули.
Попри спомнутих наших, на општинским змаганю з танцами, музичнима точками и приказами обичайох участвовали КУД „Сербия” з Кули, Дом култури Сивец, Основна школа „Вук Караджич” и КУД „Йожеф Атила” з Червинки, КУД „Дурмитор”, Мадярски културни центер „Непкер” и КУД „Иван Сенюк” з Кули и Мадярске културно-уметнїцке дружтво „Кошут Лайош” з Крущичу.