РУСКИ КЕРЕСТУР – После приношеня Одлуки о пременки шедзиска Подручней канцелариї Националного совиту (НС) Руснацох у Сримскей Митровици, хтора тераз будзе на парохиї грекокатолїцкей церкви у тим городзе, НС 28. марца меновал координациї своїх подручних канцеларийох у 10 наших местох.
Пре цо векшу улогу и присутносц у єдним локалним штредку, та провадзенє, орґанизованє и витворйованє активносцох у штирох обласцох над хторима Совит ма компетенциї, алє и за други активносци Руснацох у єдним месце, координациї маю найменєй штирох членох задлужених за обласци, а кажда канцелария ма координатора. О своєй роботи подручни канцелариї буду обовязни подношиц звит НС.
За координатора Подручней канцелариї (ПК) НС у Сримскей Митровици меновани Зоран Бережни и ище штверо члени; за координатора ПК у Коцуре Микола Ґубаш и пецеро члени; за координатора ПК у Вербаше Деян Загорянски и штверо члени; за координатора Канцелариї у Новим Садзе Наташа Мкаї Мудрох и пецеро члени; за координатора Канцелариї у Суботици Ксения Палатинус и (за тераз) тройо члени, а за координатора ПК у Новим Орахове Татяна Дудаш и пецеро члени.
За координатора Подручней канцелариї НС у Бикичу меновани Деян Бобаль и шесцеро члени; за координатора ПК у Дюрдьове Мирон Сабадош и осмеро члени, за координатора ПК у Кули Владимир Бучко и штверо члени, а за координатора ПК НС у Шидзе менована Наташа Регак и ище осмеро члени.
На схадзки Совиту препоручене же би ше до роботи подручних канцеларийох по наших местох активно уключели новинаре и дописователє „Руского слова”, а на питанє кеди будзе основана ПК у Бачинцох, предсидатель НС Славко Рац одвитовал же ше о тим роздумує, алє за то потребна порядна и активна робота, та звекшанє членства у нєдавно основаним КПД „Драґутин Колєсар” у тим месце. Док то будзе сполнєте, роботу Бачинчанох НС потрима и зоз снованьом ПК.