РУСКИ КЕРЕСТУР – У рамикох тродньовей нащиви делеґациї Пряшовского самоуправного краю (ПСК) Автономней покраїни Войводини (АПВ) пре пораду о конкретизованю Спорозуменя о медзиреґионалним сотруднїцтве АПВ и ПСК подписаного у новембру прешлого року, госци зоз Словацкей и домашнї з АПВ вчера нащивели Руски Керестур, а пред тим були у Бачким Петровцу.
У Руским Керестуре делеґация зоз Словацкей, на чолє зоз заменїком предсидателя ПСК Радославом Чухом и їх домашню, подпредсидательку Скупштини Войводини Ану Томанову Маканову, нащивели Основну и штредню школу з домом школярох „Петро Кузмяк”, дзе их привитала членїца Националного совиту Руснацох (НС) и о.д. директора Школи Хелена Пашо Павлович зоз сотруднїками, а потим Дом култури и Руски народни театер „Петро Ризнич Дядя”.
У делеґациї госцох и посланїки у Скупштини ПСК Мирослав Буйда, началнїк Бардейовского округу и Петро Сокол, началнїк Округу Стара Любовня, та Марґарета Ґайдошова, задлужена за медзинародне сотруднїцтво у Уряду ПСК.
Попри спомнутей Пашо Павловичовей, у Руским Керестуре им домашнї були предсидатель НС Руснацох и покраїнски посланїк Славко Рац, подпредсидатель НС Микола Шанта, предсидатель Вивершного одбору НС Желько Ковач, директор Дому култури Яким Рац и директорка РНТ Ивана Дудаш, а з госцами у Керестуре були и директор Заводу за културу войводянских Руснацох Серґей Тамаш и член Одбору за службене хаснованє язика и писма НС Яким Грубеня.
Хелена Пашо Павлович госцох поблїжей упознала з керестурску Школу, наглашуюци же є и єдина ґимназия по руски нє лєм у Сербиї, алє и швеце, а познєйше бешедоване и о дзепоєдних можлївосцох за сотруднїцтво у образованю. Госци поопатрали ушорени интернат и дзепоєдни учальнї, а у єдальнї Школи домашнї им пририхтали стародавни руски єдла – капущанїки, белюши, поаґачики, кашу.
У Доме култури делеґацию з ПСК и АП Войводини з рускима народнима шпиванками насампредз привитала Мишана шпивацка ґрупа, под руковительством Юлияна Рамача Чаму, а потим директор Яким Рац представел установу як єдну з трох професийних у обласци култури, як и нашо найвекши манифестациї и фестивали. О РНТ „Петро Ризнич Дядя, алє и Туристичним здруженю Руски Керестур, хторому є тиж на чолє, бешедовала Ивана Дудаш.
У розгваркох наглашене же Спорозуменє о сотруднїцтве того року будзе витворене насампредз у обласци култури, прейґ нащивох пряшовского ансамблу ПУЛС и Театру Александра Духновича, одредзених фаховцох у обласци култури, алє и у образованю, прейґ черанкох нащивох штредньошколцох и студентох. Надалєй плановане витворйованє и заєднїцких програмох у рамикох Дунайскей стратеґиї и других проєктох з хторима ше будзе конкуровац за средства з ЕУ.
