РУСКИ КЕРЕСТУР – У вчерайшей Служби Божей на 11 годзин у Руским Керестуре шпивали два хори – домашнї Мишани хор Катедралней церкви св. о. Миколая и Дому култури, под руководительством Лидиї Пашо и Хор „Алпе Адриа” з Удинох, з Италиї, з хторим дириґовал маестро Андрео Тофолини.
Службу Божу служел домашнї парох о. Михайло Малацко, котри євангелске читанє на Нєдзелю шицких святих пречитал на талиянским язику, а и у казанї тиж привитал госцох з Италиї.
Понеже госци з покраїни чий Каритас барз вельо материялно допомогол наш Каритас, з їх помоцу збудовани и Дом Каритасу у керестурскей парохиї, парох наглашел же пришол час же би нашо вязи, окрем спомнутих, постали и глїбше людски и християнски.
У провадзеню Служби дзепоєдни часци шпивал и госцуюци хор по латинским обряду, з провадзеньом орґульох, а молитву Оче наш шпивал по нашим. На концу Служби госци акапела одшпивали и три шпиванки и од числених присутних достали вельки аплауз.
По вчерайшим заєднїцким полудзенку членох двох хорох у просторийох Каритасу, а после тродньовим пребуваню у нашим краю, госци ше врацели до Италиї.
