НОВИ САД – На ютре, 6. марца, у Студию М Радио Нового Саду будзе 26. Фестивал новей рускей народней шпиванки „Ружова заградка”, хтори орґанизує Радио телевизиї Войводини (РТВ), так же го отвори ґенерални директор РТВ Срдян Михайлович. Источашнє, то и перши фестивал у року з Календару репрезентативних манифестацийох Националного совиту Руснацох.
На Фестивалє ше того року змагаю 16 нови композициї, хтори шпиваю углавним млади виводзаче, медзи нїма и два дебитантки, алє и нашо искусни и познати интерпретаторе. Шпивачох провадзи народни оркестер РТВ-а, як и провадзаца дзивоцка ґрупа з Дюрдьова.
Найлєпши текст, интерпретацию и аранжман оценї фахови жири у составе Зоран Дракула, Лїляна Барна Никитович, Оленка Сеґеди и Микола Шанта, а того року новосц же жири наградзи аж три найлєпши композициї. Будзе преглашена и найлєпша шпиванка по думаню публики, алє гласац годни лєм патраче у сали, нє и телефонски.
У ревиялней часци програми свою музичну творчосцу представи наш познати композитор, аранжер и музични фаховец Юлиян Рамча Чамо, з Вельким тамбуровим оркестром Дому култури Руски Керестур и зоз своїма госцами.
Пред початком музичней часци Фестивалу, у (долнїм) голу Студия М буду отворени вистави подобових роботох двох уметнїцох з Кули – Лидиї Барна и Амалиї Ковач. Вистави, хтори початком рока були часц програмох на Централней шветочносци означованя националного швета Руснацох у Кули, отвори директор Заводу за културу войводянских Руснацох Серґей Тамаш.
Отверанє виставох будзе на 19,30, а музична часц „Ружовей заградки”, з директним преносом на Трецей мрежи Радия РТВ и на Другей програми ТВ Войводини, почнє на 20 годзин (у терминох ТВ Маґазину и „Широкого плану”).
Цалосни знїмок „Ружовей заградки” на ТВ будзе такой на пондзелок – вноци на 2 и рано на 9 годзин, а на радию тиж на пондзелок, на 12,10 годзин.