ЖАБЕЛЬ – У Општини Жабель отримана схадзка представнїкох Националного совиту рускей националней меншини (НСРНМ), и рускей заєднїци зоз Дюрдьова, зоз предсидательом Општини Урошом Радановичом.
Спред НСРНМ бул предсидатель Вивершного одбору Славиша Сабадош, и предсидатель Одбору за службене хаснованє язика и писма проф. др Михайло Фейса, як и Мирослав Чакан зоз Дюрдьова, член Совиту за медзинационални одношеня Општини Жабель, и член Мемориялного одбору „Яша Баков”.
На схадзки догварени конкретни крочаї же би ше сполнєла инициятива есхумациї Яши Бакова зоз городского теметова у Новим Садзе, на руски теметов у Дюрдьове.
Як потолковал предсидатель ВО НСРНМ Славиша Сабадош, дюрдьовска церква Рождества пресвятей Богородици уступела гробне место на руским теметове, Општина Жабель виплаци трошки ЯКП „Лисє” котре окончи премесцанє посмертних остаткох, Дюрдьовчанє вибетоную коло нового гробного места, а каменьорезач Александар Макаї зоз Коцура задармо премесци памятнїк.
У другей часци схадзки бешедоване о службеним хаснованю руского язика и писма, присутни насампредз утвердзели и похвалєли же шицки табли зоз назвами местох, установох и институцийох правилно виписани и на руским язику.
На инициятиву присутних, догварене же и на општинским сайту убудуце дзепоєдни елементи буду виписани и по руски, так и же зоз буду поставени значни линки на руским язику.