ДЮРДЬОВ – У Основней школи „Йован Йованович Змай” у Дюрдьове од 48 малих матурантох, 47 здобули право покладац закочуюци испит. Перши два днї ше покладало мацериснки язик, односно у тей ґенерациї лєм сербски, а потим и математика. Тоти два испити покладали 47 школяре, док треци дзень испиту, кед ше покладало єден з пейц понукнутих предметох, тест ришовали 46 школяре.
Як и прешлих рокох, найлєпши просек оценох зоз виборного предмету – 10,87 боди. Тогорочна просекова оцена зоз закончуюцого испиту зоз математики – 9,18 боди, а зоз сербского – 8,43 боди. Прешлого року просекова оцена була лєпша зоз сербского у одношеню на математику.
Дюрдьовски осмаки и далєй штредньошколске школованє сцу предлужиц у Новим Садзе, та так найвецей ше уписали до штреднїх школох у Новим Садзе, Жаблю и Зренянину, по тим рядошлїду у одношеню на число уписаних. Найвецей ше их уписало до штиророчней штреднєй школи, а лєм школяре котри мали менєй як 50 боди уписали ше до тророчней штреднєй школи.
Од 47 малих матурантох у дюрдьовскей основней школи, пецеро нє придали лїстину жаданьох за упис до штреднєй школи. Тройо, прето же ше уписали до приватней штреднєй школи, а двойо прето же нє жадаю здобуц штредньошколске образованє.
