Дуня (Гнатко) Мостарлич зоз Шиду вецей як децению продукує квеце. За тот час постала препознатлїва по квецу хторе пласує на тарґовище, гоч ше досц того и пременєло.
Файти квеца хтори пестує, алє и саму продукцию, мушела присподобиц дзеки купцом, як и новим условийом. Конєц юния звичайно и конєц сезони предаваня квеца, кед ґаздинї уж помали ушорели свойо заградки, або тераси.
– У тей сезони сом дакус зменшала продукцию, а причина тому то же сом достала бебу Луку, та пре нови обставини пришло и до пременкох у моєй роботи. Нове тото же сом векшу часц квеца набавела за дальше предаванє, а потераз то нє було так. Лєгко мож вираховац и яки заробок кед ше набави уж готове квеце, або кед ше го од початку випродукує, кед треба купиц и черепчки, и глїну, и прикармйовац и допатрац квеце и аж вец го понукнуц на предай – гвари Дуня.
У тей сезони ше найвецей предавало мушкатли од 200 по 600 динари, у зависносци од велькосци, а Дуня предавала и петуниї, красного Йову, беґониї, а окреме квеце дзень и ноц хторе досц глєдане прето же витримує слунко и горучави.
Сезона почала, як и вше, пред 8. марцом кед ше уж понукало перши калиопи, алє и циклами, а у понукнуцу було и вецей файти кактусох. Дуня ма у Бикичу пластенїк, алє того року пре иншаки асортиман, нє зогривала го, та там було квеце хторе може витримац жиму у пластенїку без зогриваня. Єдну часц квеца хторе чувствительне на нїзки температури тримала у пластенїку у мацери Савети, хтора єй шицки тоти роки „права рука” у продукциї и предаваню квеца.
Пластенїк у Бикичу звичайно зогриваю на пелет, а поставена и система „капка по капку”, так же вода помали доцекала до каждого черепчка и нє мушело ше кажди черепчок окреме залївац. У пластенїку були посадзени и розмария, лаванда и гвоздзики, по потреби ше го защицовало зоз аґрил-фолию и так добре дочекало яр и вельки температури.
Цо ше дотика предаваня, Дуня квеце предава у Бикичу и ту ма и древка туйох хтори годно купиц и на пияцу у Шидзе. Муштериї хтори уж роками у нєй купую квеце найчастейше пойду до пластенїку и вибераю тото цо ше им пачи. Єст заинтересованих купцох и стреду и соботу на пияцу и, гоч остатнї роки єст досц продуковательох квеца и поведло би ше же моцна конкуренция, Дуня задовольна як ше квеце предавало.
– На першим месце квеце муши буц квалитетне же би крашнє и здраво випатрало, а тиж значна и цена, бо купци на шицко патра и так ше опредзелюю цо и кельо купя. Менши квеца менєй и коштаю, та хто ма сцерпеня, може дакус и причекац. Єст и таких цо такой сцу мац вельки квеца, та су порихтани и вецей заплациц – гвари Дуня.
