РУСКИ КЕРЕСТУР – Члени Добродзечного огньогасного дружтва стреду рано, 1. юлия, на 8:54 годзин достали поволанку за интервенцию, а на 9:03 годзин уж були на терену, понеже ше пре жирячку зоз комбая лапела сцерень на часци хотара Державки. Зоз швидку и благочасову интервенцию огень швидко загашени, згорело коло 200 квадрати сцернянки а материялней чкоди, на щесце, нє було.
Од прешлого тижня, од кеди почали дежурства, то була перша интервенция, а як поручели керестурски огньогасци – най би була и остатня. Дежура ше уж тидзень, кажди дзень од 9 рано по 21 годзин вечар, а на дежурстве шофер и огньогашец, а пионире помагаю.
З оглядом на високи температури и вигодни условия за огень, огньогасци апеловали на шицких хтори участвую у жатви же би мерковали дзе руцаю циґарчки, же би машини були исправни, же би нє чурел олєй або нафта и здогадли же по закону обовязне мац процивогньови апарат.
Кед ше дацо случи, такой треба наволац число телефона 193 або 025/703-333.
