КУЛА/РУСКИ КЕРЕСТУР – Єден з вельких проблемох кулского Дому здравя вше векши нєдостаток лїкох у його апатикарскей установи, цо пошлїдок велького длуства спрам добавячох лїкох. Пре нєвимирене длуство, добавяче нє жадаю випоручовац нови количества лїкох, нє лєм кулскей, алє и другим апатиком хтори у истей ситуациї – гварел за Рутенпрес директор Дому здравя Кула др Жарко Шевин.
Пре спомнуту причину з нєдостатком лїкох кобуря и у апатики Здравственей амбуланти у Руским Керестуре и понукаю лєм лїки хтори маю на залихох.
Нєурядово, ришенє того проблему обчекую и з новим Законом о здравственей защити, хтори би мал ступиц на моц початком шлїдуюцого року.
Потамаль, державни апатики вше баржей траца битку у нєровноправней конкуренциї з приватнима, хтори можу видавац лїки и на рецепт, а нє маю явни набавки за лїки, цо тиж очежує позицию державних апатикох, гварел др Шевин.