РУСКИ КЕРЕСТУР – Добродзечне огньогасне дружтво (ДОД) з Руского Керестура у 2014. року мало лєм осем менши интервенциї на гашеню огня, а гоч розполагало з скромнима финансиями, успишнє витворело свойо порядни активносци – винєшене на рочней Скупштини ДОД всоботу, 28. фебруара.
Як у звиту наглашел предсидатель ДОД Михайло Рац, медзи порядни активносци спада и препатрунок механїзациї пред жатву и отримованє дежурства под час жатви, запровадзованє превентивних активносцох, обука пионирох и огньогасцох, набавени трої защитни шмати, а оправена и кибла на огньогасним доме.
Подобни плани ДОД и у тим року, з тим же потребне окончиц вецей роботи на отримованю огньогасного дому.
Попри активних членох, на Скупштини ДОД були и госци з Општинского огньогасного союзу, чий предсидатель Ненад Марянович окреме похвалєл роботу керестурских огньогасцох.
Були и представителє професийней Огньогасней єдинки з Кули, як и представителє ДОД з вецей местох з хторима керестурске ДОД роками сотрудзує. Медзи нїма и ДОД з Коцура, чийо представителє керестурским колеґом подаровали трої вредни защитни шмати.
На Скупштини були и представителє дзепоєдних валалских здруженьох, предсидатель Совиту МЗ Владимир Олеяр и директор ЯКП „Руском” Иґор Фейди, котри Огньогасному дружтву и предсидательови Рацови особнє придал подзекованя за вельке доприношенє у розчисцованю шнїгу з огньогасним камионом.
Треба повесц же у тим року керестурске ДОД означує и ювилей – 85 роки снованя.
