БЕОҐРАД – Польопривреднїки котри позавчером рушели на протестне воженє, вчера на 11 тракторох, з провадзеньом полициї, сцигли опрез Скупштини Сербиї. Там их дочекали посланїки Лиґи социялдемократох Войводини (ЛСВ), котри у їх мено придали вимогу же би ше зоз скупштинскей процедури поцагло Предлог вименкох Закона о польопривредней жеми.
Инициятиву за поцагованє Предлогу порушала ЛСВ з акцию збераня подписох, а з нїм барз нєзадовольни и польопривреднїки, окреме з часцу хтора предвидзує даванє 30 одсто державней жеми правним особом под аренду на 30 роки. Предсидатель ЛСВ Ненад Чанак гварел же нє вимагаю лєм поцагованє предложеного закона, алє писанє нового, преноша медиї.
Протестуюци процив спомнутого предлогу закона, часц парастох позбераних коло Асоцияциї польопривреднїкох и других здруженьох и вчера пробовала на тракторох пойсц до Беоґраду, алє их у тей намири, як и позавчером, застановела полиция. Вони блокировали драги на вецей местох, найвецей у Банату и на сиверу Бачкей, а їх представителє вчера за медиї виявели же на драгох останю по поцагованє Предлогу вименкох Закона о польопривредней жеми.
Министерка польопривреди и защити животного штредку Снежана Боґосавлєвич Бошкович виявела вчера же Предлог вименкох Закона о польопривредней жеми робени у догварки и консултацийох зоз здруженями польопривреднїкох и же нє видзи причину за протест парастох. Гварела же є порихтана бешедовац зоз шицкима котри маю даяки зауваги на Предлог, алє наглашела же дотераз нїхто нє вимагал розгварку.