РУСКИ КЕРЕСТУР – После єй премиєри у Вербаше 25. януара, найновша представа РНТ „Петро Ризнич Дядя”- „Як забиц предсидателя” Миру Ґаврана, у режиї Владимира Надя Ачима, перше виводзенє по наших местох мала вчера на матичней сцени националного театру у Руским Керестуре, дзе є одбавена пред наисце красним числом публики.
Понеже ше з тоту представу означує и два ювилеї Янка Лендєра – 60 роки живота и 40 роки його активносци у нашим културним и театралним живоце, директорка РНТ Ивана Дудаш пред початком представи пречитала пригодни текст о його роботи, а Янко Лендєр Керестурцом, керестурскей публики, та дакедишнїому и терашньому театру „Дядя” щиро подзековал на дотерашнєй велькей потримовки у його уметнїцким виражованю.
Актуални, сучасни драмски тескт Миру Ґаврана толкую тройо ґлумци з Вербасу – Нада и Янко Лендєрово и Юлиян Медєши, та Танита Ходак з Коцура. Представа витворена у копродукциї з вербаским КПД „Карпати”, а з финансийну потримовку Националного совиту Руснацох.
Под час представи, нащивителє у голу Дому култури могли опатриц виставу фотоґрафийох младей уметнїци з Керестура Марияни Павлович, цо часц роботох з єй кнїжки чарно-билих фотоґрафийох „Проблеми”, хтора у децембру прешлого року вишла як додаток у младежским часопису МАК.
