КУЛА – Шицки инвеститоре котри на териториї кулскей општини витворя инвестицию хтора оможлїви отверанє 1 000 и вецей роботних местох – буду ошлєбодзени од плаценя порциї на маєток, локалних комуналних таксох, локалних административних таксох, як и надополнєня за защиту животного штредку покля тото число занятих 1 000, лєбо вецей – одлучене на вчерайшей схадзки Скупштини општини Кула.
Як гварел заменїк предсидателя Општини Велибор Милоїчич, кулску опшштину и єй индустрийну зону у Кули нєдавно нащивели представителє компаниї „Делта” заинтересовани за укладанє, так же и тот поцаг локалней самоуправи ище єден крочай ґу прицагованю инвеститотох пре отверанє роботних местох.
У наступних 10 дньох представителє „Делти” знова приду до Кули, а у дискусиї поведзене же кед ше одлуча отвоериц погони у општини, конєчне число нових занятих годно буц и векше як тисяч.
Гоч було лєм три точки дньового шору, Одлука о стимулацийох пре прицагованє инвестицийох на вчерайшей схадзки виволала длугшу полемику медзи Драґутином Медоєвичом з Єдинственей Сербиї (ЄС) и предсидательом Одборнїцкей ґрупи Сербскей напредней странки (СНС) Перицом Видеканїчом. Медоєвич винєсол думанє же тота одлука у смислу предвиберанковей кампанї, понеже, як гварел, вон и ЄС подобне предкладаю уж три роки, як и же з олєгчанями треба помогнуц и мали и штреднї подприємства привреднїкох з кулскей општини.
Видеканїч и Милоїчич одвитовали же ше за тот час од кеди СНС на власци у општини, зоз зменшаньом рижних таксох, та преполовйованьом ткв. еколоґийней такси, помага праве привреднїком з кулскей општини, а Видеканїч Медоєвичови зауважел и же одборнїцка ґрупа ЄС присутна лєм на початку схадзкох СО, пре власну промоцию, так же є нє упозната зоз спомнутима одлуками СО.
Обвинєл го и за демамоґию пре рижни обецунки ЄС хтори нє витворлїви у пракси, як цо и остатня же заинтересованим гражданом општини подзеля по пол гектара державней жеми, а потолковал и поцаги терашнєй власци за ришованє заґадзеносци Беґейцу, односно вецей инвестицийни укладаня до канализацийох и поцискуюцого воду пре ришованє того найвекшого еколоґийного проблему, а хтори тиж будзе у функциї прицагованя инвеститорох и злєпшаня здравя жительства.
На вчерайшей схадзки дата и согласносц на вименку Статута ЯКП „Водовод” Червинка, а пре зраженє интересох, место Милорада Вуксана, за предсидателя Комисиї за менованє директорох явних и явно-комуналних подприємствох хторим снователь Општина Кула меновани Чедомир Бероня.