НОВИ САД/БЕОҐРАД – На 60. Медзинародним сайме кнїжкох у Беоґрадзе на ютре буду предствени и виданя по руски наших видавательох з Нового Саду – НВУ „Руске слово” и Заводу за културу войводянских Руснацох (ВР).
Представянє виданьох по руски будзе на штанду АП Войводини, односно Покраїнского секретарияту за културу и явне информованє, у Сали „Бранко Чопич” беоґрадского сайму, на 11 и на 12 годзин.
На 11 годзин свойо шейсц виданя представи Завод за културу ВР – кнїжки „Руснаци у Вербаше” и „Вини и зради” Штефана Гудака (преложена на українски), мастер-роботи Александра Мудрия „Польодїлска лексика” и Андреї Медєши „Ґерманизми у руским язику”, як и каталоґ „Шицко то оглашки и реклами”.
НВУ „Руске слово” ютре на Сайме кнїжкох на 12 годзин представи тогорочни виданя – „Осце и черешнї” Агнети Бучко Папгаргаї, „Галов” Ирини Гарди Ковачевич, „Слово Бояна Двокраяна” Владимира Бесерминя, „Вселенска черкотка” Миколи Шанту и „Гришка” Асї Папуґа. „Руске слово” тиж представи и творчосц поетеси Тамари Хриновей, як побиднїцу прешлорочного Фестивалу поезиї младих у Вербаше.
О кнїжкох Заводу и „Руского слова” буду бешедовац їх рецензенти, авторе и редакторе виданьох.