ДЮРДЬОВ – У Основней школи „Йован Йованович Змай” пияток, 5. юния штерацец пецеро мали матуранти означели конєц свойого осемрочного школованя.
По традициї, у школским дворе було орґанизоване шветочне додзельованє припознаньох и дипломох. Штверо школяре достали Вукову диплому за посцигнути резултати на рижних змаганьох, и одлични успих у своїм школованю, а то штирме хлапци Боґдан Чавич, Петар Андєлкович, Илия Шовлянски и Йован Марич котри преглашени и за школяра ґенерациї.
Пригодни слова школяром, з тей нагоди висловела директорк ОШ Любица Клепич котра поздравела шицких присутних, а школяром пожадала щешлїве предлуженє школованя.
После додзельованя припознаньох и дипломох, мали матуранти одтанцовали святочни танєц котри зоз школярами пририхтала Лидия Чапко, дипломована педаґоґица котра робела у тей школи на даскельо заводи на замени и членїца Културно-уметнїцкого дружтва „Тарас Шевченко”. После того, у голу школи почало святочне преславйованє малих матурантох, їх наставнїкох и учительох, а пририхтана святочна вечера и музика.
На пол ноци бул огньомет зоз чим ше закончела преслава ище єдней ґенерациї Дюрдьовчанох.